Шахмат – адамның зияткерлік қабілетін арттыратын тамаша тренажер. Ойын кезінде мидың екі жарты шары бір мезгілде және синхронды жұмыс істейді, соның арқасында логикалық және абстрактілі, интуитивті ойлау қабілеті дамиды. Бүгінде бұл ойын түрі біздің елімізде де қарқынды дамып келеді.
Зарина КӘП,
«Семей таңы»
Кеше, 20 қаңтар күні Семей қаласында классикалық шахматтан 18 жасқа толмаған ер балалар мен қыздар арасында Абай облысы чемпионатының ашылу салтанаты өтті. Чемпионатты ұйымдастырудағы басты мақсат — шахмат ойынын насихаттау, 18 жасқа дейінгі жас спортшылардың арасында облыс чемпионын анықтау, бәсекелестік қабілетін дамыту және өзара тәжірибе алмасуына мүмкіндік жасау.
Чемпионаттың салтанатты ашылу рәсімінде Абай облысының дене шынықтыру және спорт басқармасының маманы Меруерт Аженова құттықтау сөз сөйлеп, спортшыларға сәттілік тіледі.
— Шахмат – нағыз мықтылардың ойыны. Бұл ойын уақытты бағалауға, төзімді болуға, үйретеді, жылдам шешім қабылдай білу қабілетін қалыптастырады. Тек қарсыласыңа ғана емес, өз-өзіңе де сыни тұрғыдан қарай бастайсың. Өз іс-әрекеттеріңді басқаруға, жинақы болуға әсер етеді. Сондықтан сіздердің шахматқа қызығушылықтарыңыз болашақтарыңызға көп көмегін тигізеді деген ойдамын. Еліміздегі бұл спорт түрінің дамуына бірге үлес қосайық. Бүгін шын жүйрік топ жарсын,- деді Меруерт Боранбайқызы.
Айта кетелік, жарыс 19 ақпан мен 1 наурыз аралығында өтеді. Облыс чемпионы атанған үздік шахматшы республикалық чемпионатқа жолдама алады.
— Бүгін, жыл сайынғы дәстүр бойынша, 6 — 18 жас аралығындағы ұлдар мен қыздар арасында классикалық шахмат түрінен облыстық чемпионат бастау алды. Бородулиха ауданынан және Шар қаласынан, сонымен қатар Семей қаласынан барлығы 148 шахматшы қатысып жатыр. Жеңімпаздар наурыз айында Алматы қаласында өтетін Қазақстан Республикасы чемпионатында бақ сынайтын болады. Дәл осындай чемпионатты оқушылардың күзгі демалысына таяу уақытта тағы да бір мәрте өткізу жоспарда бар,- дейді Абай облысы бойынша аға жаттықтырушы Бақытжан Маратұлы.
