ЖАРЫҚ МӘСЕЛЕСІ ЖИЫНДА КАРАЛДЫ
Нұрдәулет КӘКІШЕВ, «Семей таңы»
Келер жылдың 1 қаңтарынан бастап электр жарығының бағасы қымбаттамақ. Бұл жайында бейсенбі күні қалалық әкімдіктің үлкен залында өткен қоғамдық кеңестің отырысында мәлім болды.
ҚР табиғи монополияларды реттеу жөніндегі Агенттігінің ШҚО бойынша департаментінің директоры Қайрат Оразбаевтың жетекшілік етуімен өткен қоғамдық кеңестің отырысына қала әкімінің орынбасары Асхат Хосчанов, қалалық ардагерлер кеңесінің төрағасы Амантай Доғалақов және қалалық ақсақалдар алқасының мүшелері, сонымен қатар, «Шығысэнерготрейд» ЖШС-нің директоры Вячеслав Аксенов пен аталмыш кәсіпорынның Семейдегі филиалының жетекшісі және өзге де жылу мекемелерінің мамандары қатысты. Жиында Қайрат Назарұлының кіріспе сөзінен соң алғашқы болып «Шығысэнерготрейд» ЖШС-нің директоры Вячеслав Аксенов сөз алды. Оның айтуынша, 2014 жылдың 1 қаңтарынан бастап кәсіп-орын электр жарығының бағасын қымбаттатуға мәжбүр. Себебі, электр энергиясын тасымалдау да, сатылым бағасының тарифі де 8 пайызға артқан. Сонымен қатар, үстіміздегі жылдың 1 қарашасынан бастап «КЕGОК» АҚ-ның жүйелік қызметінің тарифі де қымбаттаған.
— Электр қуатының тарифі жалпы республика бойынша және еліміздің көптеген қалаларында 12,89 теңгені құраса, ең жоғары тариф Батыс Қазақстан облысында, 14,6 теңге. Ал, Қазақстан бо-йынша ең арзан электр қуатының тарифі тек Шығыс Қазақстан облысында, — дейді В. Аксенов.
Вячеслав Аксеновтың сөзіне сүйенсек, «Шығысэнерготрейд» ЖШС-і 9 жылдан бері ғимаратты жалға алып келеді. Сондықтан, жеке басыбайлы ғимарат сатып алу үшін және кәсіпорынды жаңа техникалармен жабдықтап, жұмысшылардың жалақыларын арттыру үшін электр жарығының құнын арттыру қажеттіліктен туындап тұрған көрінеді. Басшының мәлімдеуінше, кәсіпорындағы жұмысшылардың орташа жалақысы 90 мың теңгені құрайды екен.
Сонымен қатар, мамандар бағаның қымбаттауын аталған салада қызмет ететін монополист компаниялардың әрекетімен байланыстыруда. Шығыс аймағы жарықты өзге қалалардан сатып алуға мәжбүр екенін де алға тартады.
— Бүгінде облыс бойынша жарты млн-нан астам электр қуатын тұтынушы бар болса, Шығыс өңірі жарықты Екібастұз, Согринкий сияқты өзге қалалардағы электр станцияларынан сатып алады. Үстіміздегі жылдың басынан бері 13,9 млрд. теңгенің электр қуаты сатып алынды. Ал 2014 жылы бұл цифр 15 млрд. теңгеге артпақ. Себебі, жарықтың әлі де жетіспейтіндігі сезілуде. Биылғы жылы тариф 9,123 теңгені құраса, 2014 жылдың қаңтар айынан бастап 10,230 к/ВТ-қа қымбаттайтын болады, — дейді «Шығысэнерго-трейд» ЖШС директоры Вячеслав Аксенов.
Қоғамдық тыңдауда мамандардың сөзіне қарсылық танытқандар да болды. Кеңеске қатысушылар тарапынан сансыз сауалдар жолданып, өздерінің пікірлерін де білдірді.
ҚР табиғи монополияларды реттеу жөніндегі Агенттігінің ШҚО бойынша департаментінің директоры Қайрат Оразбаев жиналғандарға тариф жа-йын түсіндіріп, олардың сұрақтарына жауап беріп отырды.
— Бүгінгі күні барлық коммуналдық қызмет түрлеріне тариф қымбаттап жатыр. Бұл жағдайды көпшілік түсіне бермейді. Шығыс Қазақстанда екі бірдей, яғни, «Бұқтырма» және «Шүлбі» электр станциялары бар болғанымен, электр қуаты жеткіліксіз. Сондықтан, біз электр жарығын Қазақстанның өзге де қалаларынан сатып алуға мәжбүрміз. Осы келеңсіздікті жою үшін тағы да екі электр станциясын салу жоспарда бар. Алайда, сол нысандарды салатын жер мәселесі проблема болып отыр, — дейді Қ. Оразбаев бір сөзінде.
Ал, электр жарығының қымбаттауы жылу мен ыстық судың да бағасының артуына алып келетіні белгілі. Сондықтан, «Теплокоммуноэнерго» жылу орталығы да келер жылдың басынан бастап жылу мен ыстық судың бағасын 57 пайызға арттыруға өтініш білдірген.
Бұл жағдай да қоғамдық тыңдауға қатысушылардың алаңдаушылығын тудырды. Алайда, осы тұрғысындағы сауалдар да тиісті жауабын алды.
— Біздің жұмысымыз – тұтынушыларды қолдап, тарифтік жоспардың бағасын төмендету. Алайда, жұртшылықты электр жарығымен қамтамасыз етіп отырған кәсіпорындарды да шығынға батыруға жол бере алмаймыз. Егер олардың жұмысы тоқтап қалатын болса, жарықтың да мүлдем болмай қалатынын ескергеніміз абзал, — деген Қайрат Оразбаев жұртшылықты бұл жағдайға түсіністік танытуға шақырды.
Жиынға қатысушылардың бірі, қалалық ардагерлер кеңесі төрағасының орынбасары Рашида Хасанова да өз кезегінде сөз алып, электр жарығына қатысты пікірін білдірді. Сөзінің басында Ұлы Отан соғысы ардагерлері мен еңбек ардагерлерінің мамыр, маусым, шілде айларында электр қуаты мен жылуға төлемақыдан босатылғаны үшін барша ардагерлердің атынан алғысын айтты.
Жиын барысында келер жылдан бастап электр жарығы мен жылу төлемақысының құны артып жатса, тұрғындардың түсіністікпен қарап, бұл жағдайға алдын ала дайын болуы керектігі ескертілді.
