16 мамыр күні Абай өңірлік коммуникациялар қызметінде Аграрлық несие корпорациясы» АҚ басқарма төрағасының орынбасары Марлен Нәбиев, Жұмыспен қамтуды үйлестіру және әлеуметтік бағдарламалар басқармасы басшысының орынбасары Айман Нұрлыбек, «Аграрлық несие корпорациясы» АҚ Абай облысы бойынша филиалының директоры Әсет Сәдуақасовтың қатысуымен баспасөз мәслихаты өтті.
Жадыра ТӨЛЕГЕНҚЫЗЫ,
«Semeı tańy»
«Аграрлық несие корпорациясы» АҚ 2001 жылы құрылған. 2021 жылы қоғам «Бәйтерек» ұлттық басқарушы холдингі» АҚ компаниялар тобына біріктірілді.
— Қазіргі таңда «ҚазАгроқаржы» компаниясы «Аграрлық несие корпорациясы» АҚ құрамына енді. 2001 жылдан бері 2,6 трлн теңге қаражат бөлінді. Құрамында 19 филиалы бар. Желтоқсан айында Абай облысы бойынша филиалы ашылып, сәуір айында директоры тағайындалды,- деді Марлен Набиев.
«Аграрлық несие корпорациясы» АҚ негізгі үш бағытта жұмыс істейді: инвестициялық жобаларды, көктемгі егін және дала жұмыстарын қаржыландыру, сондай-ақ микронесиелер беру.
— Соңғы үш жылда «ҚазАгроқаржы» компаниясымен бірге қосқанда портфеліміз 1 млрд 33 млн теңгені құрады. Былтыр ауылшаруашылық тауарын өндірушілерге 1,7 трлн теңге қаржы берілсе, соның 77 пайызы Аграрлық несие корпорациясы арқылы қаржыландырылды,- деді Марлен Набиев.
Жастардың кәсіпкерлігін қолдау бағдарламасы туралы жұмыспен қамтуды үйлестіру және әлеуметтік бағдарламалар басқармасы басшысының орынбасары Айман Нұрлыбек айтып берді. Оның айтуынша, биыл Абай облысы бойынша 1 млрд теңгеге 211 шағын несие беру жоспарланып отыр. Бірақ несиенің орташа сомасы 4,4 млн теңгені құрап отырғандықтан, несие алушылар саны бұдан көп болуы мүмкін.
— Мемлекет басшысының тапсырмасымен 2,5 пайызбен 5 млн теңгеге дейін шағын несие беруге өтініш қабылдау 2023 жылдың наурыз айынан басталды. 16 мамырдағы жағдай бойынша, «Аграрлық несие корпорациясы» АҚ-ның Абай облысы бойынша филиалында 125 өтінім қабылданса, 72 жоба конкурстық комиссияға жолданды. Сәуір айында 10 жоба қарастырылып, сегізі оң шешім тапты. Мамыр айының соңына дейін сегіз азаматқа несие беріледі. 18-19 мамыр күндері қалған алпыс жоба қарастырылады. Жобалардың көпшілігі, негізінен, мал шаруашылығын дамыту бағытында. Өтінім берушілер саны жағынан Ақсуат, Үржар аудандары көш бастап тұр, — деді А.Нұрлыбек.
Бағдарламаға 21 жасқа толған және 35 жасқа дейінгі ресми түрде жұмыс істеп жүрген жастар да, кәсіпкерлер де қатыса алады. Кепіл мүлік болуы міндетті. Сонымен қатар қарыз алушының өтініш бергенге дейінгі соңғы 2 жыл ішінде банктер мен қаржы институттары алдындағы 180 күннен асатын мерзімі өткен берешегі болмауы керек. Несиелендірудің мақсаттары қызмет бағыттарына сәйкес болуы қажет. Мал шаруашылығы жобалары бойынша 7 жылға дейін, басқа салалар бойынша 5 жылға дейін несиелер береді.
