«ASSYL DOMBYRA» республикалық ақындар айтысының алғашқы іріктеу кезеңі Семейде өтті. «Асылтас» қоғамдық қорының ұйымдастыруымен, Абай облысы мәдениет, тілдерді дамыту және архив ісі басқармасының қолдауымен ұйымдастырылған сөз додасына Солтүстік, Шығыс Қазақстан, Алматы, Павлодар, Ұлытау, Жамбыл облыстары мен Астана, Алматы, Шымкент қалаларынан 16 ақын қатысты.
А.ӘБІЛ,
«Semeı tańy»
Айтысты белгілі айтыскер, Парламент Мәжілісінің депутаты Ринат Зайытов жүргізді. «Хабар» Агенттігі» АҚ басқарма төрағасы Берік Уәли, айтыскер ақын Серік Қалиев, Қазақстан Жазушылар одағы аймақтық филиалының төрағасы Дәулеткерей Кәпұлы, Ұлытау облысының мәдениет, тілдерді дамыту және архив ісі басқармасының басшысы Әнуар Омар, белгілі ақын Ақберен Елгезек қазылар алқасының құрамында болды.
Ерекше атап өтерлігі, мұндай республикалық деңгейдегі айтыс Семейде 2006 жылдан бері өтпеген екен. Содан да болар, залға халық лық толды. Кешкі сағат 6-да басталған айтыс сағат 11-ге таман аяқталды.
— Айтыс – халқымыздың болмысын айшықтайтын ерекше өнер. «Асыл домбыраның» биылғы, алғашқы іріктеуі Семейде өтіп жатыр. Келесі іріктеу Атырауда болады. Ақтық сайыс, суперфинал, 1-2 шілде күндері Ақсуат ауданында «Тұғыры биік Тарбағатай» фестивалінің аясында өтеді. Жалпы, Семей мен Атырау қалаларын таңдауымыздың себебі — қаймана қазақтың батысын да, шығысын да біріктірген ұлы тіліміз – айтысымыз. Біз жершілдікке бөлініп тұрған жоқпыз. Біз батыс пен шығыстың ортасында алтын көпір болып, қазақтың сүтпен бітіп, сүйекке өткен айтыс өнерін одан сайын жаңғыртсақ дейміз,- дейді «Асылтас» қоғамдық қорының құрылтайшысы, белгілі меценат Дулат Тастекеев.
Сонымен, алғашқы іріктеуден Айтбек Тұрсынбаев, Қанат Мырзахан (Жамбыл облысы), Хавдолла Бейісхан (Солтүстік Қазақстан облысы), Айбек Жеңісқазин, Жасұлан Мақаев (Абай облысы), Ерлан Дәулет (Ақмола облысы), Нұрмахан Жақып (Шымкент қаласы) пен Шынарбек Тұрсын (Алматы облысы) сынды 8 ақын сүрінбей өтті.
Естеріңізге сала кетейік, «ASSYL DOMBYRA» сайысында ең алғаш Қазірет Бердіхан жеңімпаз атанған болатын. Ал былтыр Ринат Зайытов топ жарған еді.
