Өткен аптада Семей қаласында дарындылар шеруі өтті. Дәстүрлі шеруде қала мектептерінің оқу жылы ішінде білім сайыстары мен шығармашылық байқауларда жеңіске жеткен 500-ден астам оқушылары марапатталды. Іс-шараға қала әкімінің орынбасары Жәнібек Мұқатаев, қалалық мәслихат депутаттары, педагогикалық еңбек ардагерлері, Шәкәрім университетінің профессор, оқытушылары, ата-аналар қауымдастығы, қалалық педагог қызметкерлерінің кәсіподақ ұйымының басшысы қатысты.
Дарындылар шеруінде ғылым негіздері бойынша олимпиаданың облыстық кезеңінде 83 оқушы, республикада 243 оқушы, ғылыми жоба бойынша облыста 71 оқушы, республикада 4 оқушы, халықаралық деңгейде 4 оқушы, спорттық сайыстар мен шығармашылық конкурстардың республикалық кезеңінде 85 оқушы, халықаралық спорттық жарыстарда 43 оқушы марапатталды.
Іс-шараға қатысушылар дарынды оқушыларды марапаттарымен құттықтап, ізгі тілектерін білдірді.
Семей қаласы кәсіподақ ұйымының басшысы Жанат Ахметжанқызы дарынды балаларды білім сайыстарына дайындаған ұстаздарды марапаттап, арнайы сыйлықтарын табыс етті. Оқу жылы ішінде мектеп оқушыларын ғылыми жобалар сайысына дайындап, білім беру мекемелерімен бірлесе жұмыс атқарған Шәкәрім университетінің ғалымдарына қала әкімінің алғыс хаты табысталды.
Дарындылар шеруінің соңы мерекелік концертке ұласты.
Өз тілшіміз
