Семей қаласында «Халық заңгері» жалпыұлттық акциясы ұйымдастырылды. Еліміздің барлық ірі қалаларында бір мезгілде ұйымдастырылған ауқымды іс-шараға облыс бойынша 27 ұйым қатысты. Жылына бір мәрте өтетін «Халық заңгері» жалпыұлттық акциясының негізгі мақсаты — халыққа тегін құқықтық кеңес беру.
Акция барысында білікті заңгерлер мен адвокаттар, құқықтанушы мамандар тұрғындарды қабылдап, тегін заң көмегін көрсетті.
— «Халық заңгері» жалпыұлттық акциясы 2016 жылдан бері ұйымдастырылып келеді. Басты мақсат — халықтың құқықтық сауаттылығын арттыру және құқықтық көмек көрсету. Осы уақытқа дейін акция аясында ел көлемінде 150 мыңнан астам адам көмек алды. Қазіргі таңда еліміз бойынша 20 қалада бір мезгілде осы акция жүріп жатыр, — деді Қазақстан Республикасының Сыбайлас жемқорлыққа қарсы іс-қимыл агенттігінің Абай облысы бойынша департаменті басшысының бірінші орынбасары Рүстем Тоқбергенов.
Акция барысында тұрғын тергеушілерге, сот орындаушыларына, құқық қорғау органдары, кәмелетке толмағандармен жұмыс жөніндегі қызметкерлерге, әділет, көші-қон полициясы, банк омбудсменіне жеке мәселелерімен жүгініп, жан-жақты кеңес алды.
«СТ»-ақпарат
