26 қазан күні Абай театрында Әлихан Бөкейхан Университетінің 25 жылдық мерейтойына арналған салтанатты жиын өтті.
Жадыра ТӨЛЕГЕНҚЫЗЫ,
«Semeı tańy»
Әлихан Бөкейхан университеті — Абай облысындағы ең ірі, көп салалы жоғары оқу орындарының бірі. Құрылғанына 25 жыл болған университетте бакалавриат, магистратура және докторантура деңгейлерінің күндізгі және қашықтан оқу бөлімдерінде мемлекеттік грант есебінен және ақылы бөлімдерде 7000-нан астам жас білім алуда.
Өткен аптада оқу орны өзінің ширек ғасырын атап өтті. Салтанатты жиынға ҚР Ғылым және жоғары білім министрлігінің Ғылым және жоғары білім саласындағы сапаны қамтамасыз ету жөніндегі комитетінің төрағасы Әділет Тойбаев, ҚР Қорғаныс министрлігі Әскери білім және ғылым басқармасы басшысының орынбасары полковник Бегім Нұрмаханов, республиканың ғылыми-педагогикалық қауымы, жергілікті атқару органдары өкілдері, жұмыс берушілер, шетелдік әріптестер мен университет түлектері қатысты.
Іс-шараның мақсаты – жоғары оқу орнының өсу-өркендеу жолын қоғам алдында қорытындылау, жетістіктерімен таныстыру, университет дамуының жаңа стратегиясына қарқын беру, профессор-оқытушылар құрамының және қызметкерлердің ерен еңбегіне баға беру.
Жиын барысында Ғылым және жоғары білім министрлігі мен Қорғаныс министрлігінің, жергілікті атқарушы органдар мен университеттің серіктес ұйымдарының өкілдері оқу ордасының басшылығына, еңбек сіңірген қызметкерлері мен ұстаздар қауымына түрлі деңгейдегі марапаттар табыстады.
Салтанатты жиынмен қатар, театр холында «Alikhan Bokeikhan University: Дәстүр. Құндылық. Мәртебе» атты университеттің академиялық және ғылыми жетістіктерінің көрмесі ұйымдастырылды.
