Семей – қазақстандық футболдың отаны. Бірақ кәсіби футболмен қала бірнеше жыл бұрын қоштасуға мәжбүр болды. Ал осыдан бір ғасырдай уақыт бұрын тұңғыш қазақстандық футбол командасында жерлесіміз, көрнекті классик Мұхтар Әуезов ойнаған болатын.
Сымбат ҚАЙРАТҚЫЗЫ,
«Semeı tańy»
Семейдегі кәсіби футболдың жандануы туралы қала облыс орталығы мәртебесіне ие болған кезден айтыла бастады. «Елім-айдың» екінші тынысының ашылуына облыс әкімі Нұрлан Ұранхаевтың ықпалы зор.
Ұзақ жылдан кейін «Елім-ай» футбол клубының жандануы облыстың спорт тарихындағы жаңа тараудың бастауы болды.
Бірінші лигада өнер көрсеткен команда 28 кездесу өткізіп, 76 ұпай жинап, көптен күткен кубокка ресми түрде ие болды.
Маусымның соңғы матчында «Елім- ай» ФК мен «Ақжайық» ФК кездесті. Ойында семейлік клуб 2:1 есебімен жеңіске жетті. Гол авторлары — Павел Яковлев пен Бека Кавтарадзе.
«Елім-ай» ФК жеңіске жету жолында өте тәжірибелі спортшылардың командасын жинай алды. Маусым барысында бірде-бір жеңіліс көрмеген футбол клубының әр матчына мыңдаған жанкүйер келіп, қолдау көрсетіп отырды.
