Абай облысының энергетика және тұрғын үй-коммуналдық шаруашылығы басқармасының басшысы Серік Туленбергенов пен Семей қаласы әкімінің орынбасары Рамиль Досмағанбетов Восход және Водный кенттерінің тұрғындарымен кездесті.
Айтолқын САМАТОВА,
«Semeı tańy»
Кездесу барысында тұрғындар жол мәселесіне қатысты шағымдарын білдірді.
«Қуатты өңірлер — ел дамуының драйвері» ұлттық жобасы шеңберінде биыл Восход және Водный кенттерінде су құбыры желілерін салу жұмыстары басталған еді. Жоба аясында Водный және Восход кенттерінде ұзындығы 36 шақырым су құбыры желілерін салу көзделген. Жоба іске асқаннан кейін тұрғындар толықтай таза ауыз сумен қамтамасыз етіледі.
Мердігер мекеме «AKM Invest Group» ЖШС келесі аптаның соңына дейін Республика және су құбырлары тартылған көшелердің бойына қиыршық тас төгу, жол жабынын теңестіру және ретке келтіру жұмыстарын жүргізетінін жеткізді.
Айта кетейік, биыл Семей қаласының шеткері аумақтарын дамыту жоспары әзірленген болатын. Жаз маусымында Водный және Восход кенттері мен саяжайларында жол жөндеу, жаңа жол белгілерін орнату, су құбырларын тарту, балалар ойын алаңдарын жабдықтау жұмыстары жүргізілді.
Бұдан бөлек биыл Семей қаласының орталық және шеткері аумақтарында 50-ге жуық көше жарықтандырылды. Тозған бағаналар ауыстырылып, сынған шамдар ішінара жөнделді. Жағалау ауданындағы Сәтбаев көшесі, Жеңіс саябағы, Бейбітшілік аралы, Жамақаев көшесіндегі қоғамдық кеңістік, шіркеу алдыңдағы алаң, аквапарк аудандары қосымша жарықтандырылды. Степной, Жоламан, Суық бастау, Шығыс кенті, Мирный, Затон, Комсомол кентеріндегі бірнеше көшеге жаңадан 1000-ға жуық жарық бағаналары орнатылды.
Қала әкімінің орынбасары Рамиль Досмағанбетов сонымен қатар жылу құбырларын ауыстыру кезінде қазылған қала көшелерін де аралады. Көшпелі кеңеске қалалық ТҮКШ бөлімінің басшы және мердігер ұйымдардың өкілдері қатысты.
Қазіргі күні Мәңгілік ел, Цемент кенті, Титов және басқа да көшелерін қалпына келтіру жұмыстары жүргізілуде. “Мердігер ұйымдардың жұмысы қала әкімдігінің қатаң бақылауында. Жұмыстарды осы айдың ортасына дейін толық аяқтауды тапсырамын”,- деді Рамиль Майшұланұлы мердігер ұйымдардың басшыларына.
Биыл Семей қаласында 45 шақырымға жуық жылу құбырлары ауыстырылды. Қазылған жерлер мердігер ұйымдардың есебінен қалпына келтірілуде.
