Бүгінде елімізде мүмкіндігі шектеулі жандарды әлеуметтік қолдау ғана емес, оларға материалдық тұрғыдан жәрдем жасау ісі де кеңінен жолға қойылған. Бұл ретте көбінесе қоғамдық қорлар мен қайырымдылық ұйымдары, сонымен қатар отандық брендтер де нәтижелі жұмыс жүргізуде.
Жуырда «Dos Ortopedia» брендінің еліміз бойынша мүгедектерді қолдау аясында өткізген қайырымдылық акциясының нәтижесінде Абай облысындағы мүмкіндігі шектеулі жандарға бес арнайы жүріп-тұру құралы табысталды.
Аталған іс-шараға облыстың арнаулы әлеуметтік қызмет көрсететін орталықтары, мүгедектігі бар жандарға қызмет көрсететін үкіметтік емес ұйымдар, қоғамдық қор, жүріп-тұру құралдарын пайдаланатын мүгедектігі бар жандар қатысты.
Арнайы ұйымдастырылған іс-шара барысында қазақстандық брендтің басшысы Төремұрат Төлегенов жиналғандарды компанияның негізгі қызметімен таныстырып өтіп, өз өнімдерінің тұсаукесерін жасады.
Сонымен қатар аталған бренд жетекшісі мүгедектігі бар жандарға әрқайсысының диагноздарын, олардың ерекшеліктерін ескере отырып, сол адамға ыңғайлы арбаларды таңдауға көмектерін көрсететінін де жеткізді.
Сөз орайында айта кетелік, 2018 жылы «ДОС» және «Тәуелсіз өмір» мүгедектер орталығының қызметкерлері өзара бірлесіп «Dos Ortopedia» брендін жасаған болатын. Бұл мүгедектер арбалары мен оларды оңалту өнімдерінің алғашқы қазақстандық бренді саналады. Негізгі мақсаты — мүмкіндігі шектеулі жандардың өмір сүру сапасын жақсарту және ерекше қажеттіліктері бар адамдар үшін қолайлы жағдай жасау. Басты міндеттері — ересектер мен балаларға физикалық мүмкіндіктерінің шектеулі екендігіне қарамастан өздерін сенімді және өзгелермен тең сезінулеріне көмектесу. Ал «Dos Ortopedia» еліміз бойынша сапа мен қолжетімді бағаға лайық әрі түрлі қайырымдылық шараларын жиі ұйымдастыратын бірегей бренд болып тұр.
Аталған іс-шараға қатысқан мүгедектігі бар жандар қайырымдылық акциясын ұйымдастырушыларға алғыстарын білдірді.
