Астанадағы «EXPO» Халықаралық көрме орталығының алаңында және қалалық колледждердің базасында «WorldSkills Kazakhstan — 2023» VIII Республикалық кәсіби шеберлік чемпионаты өтті. Колледж студенттері арасындағы чемпионатқа еліміздің 20 өңірінен 545 студент, 520 сарапшы қатысты.
Сымбат ҚАЙРАТҚЫЗЫ,
«Semeı tańy»
Кәсіби шеберлік чемпионатында студенттер 30 түрлі сұранысқа ие мамандықтар бойынша сынға түсті. Соның ішінде «Кірпіш қалау», «Кондитерлік іс», «Сырлау және сәндік жұмыстар», «Прототиптеу», «Плиткамен қаптау», «Наубайхана ісі», «Жеңіл автомобильдерді жөндеу және қызмет көрсету», «Мейрамхана қызметі», «Дәнекерлеу технологиялары» және тағы басқа салаларға баса мән берілді.
WorldSkills чемпионатының ашықтығын қамтамасыз ету үшін сарапшыларды іріктеу және бағалау автоматтандырылған. WorldSkills қозғалысы жұмысшы мамандықтарын танымал етуге, беделін арттыруға бағытталған.
Чемпионаттың марапаттау рәсімі Бейбітшілік және келісім сарайында өткізіліп, Оқу-ағарту министрі Ғани Бейсембаев арнайы қатысты. Министр барлық қатысушыларды техникалық және кәсіптік білім беру саласындағы айтулы іс-шарамен құттықтап, ел экономикасын дамытудағы жұмысшы мамандықтарының рөліне ерекше тоқталды.
Командалық есепте 30 құзырет бойынша 6 алтын, 2 күміс, 3 қола медальды жеңіп алған Абай облысының командасы үздік атанды.
Кәсіби шеберлік чемпионатының жеңімпаздары «Grohe», «Knauf», «1С Казахстан», «Robert Bosсh», «Welding Company», «ESAB» сынды еліміздің жетекші компанияларынан және тағы басқа да кәсіпорындардан жұмысқа шақыртулар алды. Конкурсқа қатысқан барлық 545 студент WeDoEducation-нен түрлі салалардағы кез келген таңдаған мамандық бойынша білім алу үшін гранттарға ие болды.
Жеңімпаздар 2024 жылдың 10-15 қыркүйегі аралығында Францияның Лион қаласында өтетін WorldSkills халықаралық чемпионатына қатысатын болады.
