Ұзақ жылдардан бері жөндеу көрмей, басталған іс ілгерілемей, тұралаған кейбір республикалық маңыздағы жол бөліктері жайлы осыған дейін де сан мәрте көтерілген болатын.
Әлібек КЕМЕЛХАН,
«Semeı tańy»
Әсіресе Қалбатау – Аягөз — Таскескен бағытындағы ұзын жолдың жағдайы — облыс тұрғындарын жиі мазалайтын мәселе. Әсіресе жаз мезгілінде Алакөл көліне қатынайтын туристер тарапынан Семей мен Таскескен ауылына дейінгі 92-ші шақырым аралығындағы жолды жөндеу туралы ұсыныстар әлеуметтік желілерде де жиі жарияланған болатын.
ҚР Парламенті Мәжілісінде Абай облысындағы күре жолдарды жөндеу мәселесі бірнеше рет көтерілді. Халық қалаулысы Нұртай Сабильянов ел Үкіметіне депутаттық сауал да жолдады.
Аталған мәселені Экономикалық реформа және өңірлік даму комитетінің кеңейтілген отырыстарында жаңадан құрылған Көлік министрлігі мен «Қазавтожол» ұлттық компаниясы басшылары да талқылады. Соның нәтижесінде тиісті шешімдер қабылданып, бақылауға алынды. Абай облысы әкімдігі жол жөндеу жұмыстарының барысын қатаң назарға алды. Жаз бен күзгі мезгілдерде аталған жолды жөндеу жұмыстары қарқынды жүргізілді. Жөндеу жұмыстарының барысын, сапасын республикалық комиссия өкілдері де бірнеше рет келіп көрді. Үкімет тарапынан қолға алынған жол жөндеу жұмыстары қарашаның соңында 99 пайызға орындалды. Нақтылап айтсақ, Қалбатау – Аягөз – Таскескен — Үшарал бағытындағы жолға жаңадан асфальт төселіп, жолаушыны діңкелететін айналма жолдар алынды. Қозғалыс қалпына келтірілді. Енді Алматыдан Семейге, Өскеменге және Семейден Алакөл көліне көп уақыт жоғалтпай, машақатсыз, шаршамай әрі жылдам жетуге болады. Аталған жолдың жөнделгеніне әсіресе Жарма, Аягөз, Үржар аудандарының тұрғындары дән риза.
