Абай облысында «Бірге! бір толқында!» тақырыбымен жастар форумы өтті. Оған Абай облысындағы жастар ұйымдарының жетекшілері, еріктілер, белсенді жастар мен студенттік клуб мүшелері қатысты.
С.БАУЫРЖАНОВА,
«Semeı tańy»
Іс-шараның басты мақсаты – жастардың көрнекті жетістіктерін көру және тану, сонымен қатар өңірдегі өскелең ұрпақтың дарынды өкілдеріне қолдау көрсету.
Форум барысында облыс әкімі Нұрлан Ұранхаев жастардың жеткен жетістіктерін атап өтіп, алдағы істеріне сәттілік тіледі.
Марапатқа 80-ге жуық қатысушы құжат өткізген. Аймақ басшысы солардың ішінде 7 аталым бойынша үздік деп танылған азаматтарды салтанатты түрде марапаттады.
«Жыл волонтері» аталымына Нұрлан Төлеутаев пен Дильназ Тәңірберген ие болса, «Жыл көшбасшысы» номинациясын Алиби Абдураимов жеңіп алды. Ал «Жылдың үздік жастар ұйымы» аталымына «Абай Жомарт жастары» мен «Интеллектуалды жастар қауымдастығы» ҚҚ лайықты деп танылды.
Сондай-ақ «Жылдың жас еңбек адамы» аталымымен Мират Әлихан мен Иван Головнев марапатталса, «Жылдың жас таланты» аталымы Баян Жақановқа бұйырды. «Жас отбасы» аталымына Аягөз қаласында тұратын Сағатбековтер отбасы ие болды. «Жылдың үздік жастар ресурстық орталығы» номинациясына Үржар және Абай аудандарының жастар орталықтары лайықты деп танылды.
