Балалардың асыға күтетіні де шырша мерекесі. Жексенбі, 24 желтоқсан күні Абай облысы әкімінің шыршасы өтті. Мерекелік шараға аймағымыздағы сегіз аудан мен екі қаладан ата-анасының қамқорлығынсыз қалған, аз қамтылған және көпбалалы отбасылардан шыққан, ерекше білім беруді қажет ететін балалар, сондай-ақ оқуда, спортта, шығармашылықта, қоғамдық өмірде жоғары жетістіктерге жеткен 150 бала қатысты. Шарада Абай облысы білім басқармасының басшысы Нұржан Ахметқалиев балаларды Жаңа жылмен құттықтады.
Әйгерім СӘРСЕНҚАЛИ,
«Semeı tańy»
— Қымбатты жас достар! Сіздерді бүгінгі облыс әкімінің шыршасында көргеніме қуаныштымын. Келе жатқан Жаңа жыл мерекесі құтты болсын! Ең бастысы — денсаулық, сапалы білім және тәрбие. Облыс басшылығы сіздер үшін барлық жағдайды жасайтын болады. Дендеріңізге саулық, оқуда табыс, алға қойған мақсаттарыңыздың орындалуын тілеймін,– деді Нұржан Нығметоллаұлы.
Көңілді шарада балалар облыстық театр әртістерінің, аниматорлардың және облыстық балет мектебінің қатысуымен театрландырылған қойылымды тамашалады. Жаңа жылдың басты кейіпкерлері Аяз ата мен Ақшақар келіп, балаларға сый-сыяпат жасады.
— Бүгінгі мереке ерекше есте қаларлықтай өтті. Театрландырылған қойылымды тамашаладық. Қойылымда Жаңа жылдың есігін ашатын кілтті табуымыз керек еді. Жалғыз көзді дәу бейнесіндегі кейіпкер келіп балалар мен жасыл айдаһарды қорқытып, кілттерді шашып кетті. Біз бірнеше қадам арқылы кілттерді табуға тырыстық. Әр түрлі тапсырмаларды орындадық. Соңында мақсатымызға жеттік. Бұл шырша мерекесі мен үшін бұрынғыдан өзгерек болды,- дейді Үржар ауданынан келген көп балалы отбасында тәрбиеленіп жатқан үздік оқушы Еркежан Дүйсенова.
Шырша мерекесіне арнайы келген балалар үшін Семей қаласының тарихи-өлкетану мұражайы мен Биологиялық орталыққа экскурсия ұйымдастырылып, фильм көрсетілімі ұсынылды.
Жаңа жылдық шаралар легі кеше, 25 желтоқсан күні Семей қаласында ерекше білім беруді қажет ететін 100 балаға арналған жаңа жылдық қойылыммен жалғасты. Бұл іс-шараға облыстың арнайы мектептеріндегі және интернаттардағы тәрбиеленушілер ата-аналарымен бірге шақырылды.
Жалпы, ағымдағы жылы Абай облысы әкімдігі ұйымдастырған жаңа жылдық шыршаға 450 бала қатысты. Бұдан бөлек өңірден 5 бала Астана қаласына барып, Президенттік меркелік шыршаға қатысты. Мерекелік шараға қатысқан әр балаға 100 мың теңгеге сертификат, тәттілер мен ойыншықтар сыйға тартылды.
