Қазақстан Республикасының Ақпарат және мәдениет министрі Аида Балаева Абай ауданына арнайы жұмыс сапарымен барды. Абай облысы әкімінің бірінші орынбасары Шалқар Заманбекұлы министрмен бірге жүрді.
Қуаныш ҚОЖАЕВ,
«Semey tany»
Меймандарды Абай ауданының әкімі Мейіржан Смағұлов бастаған жергілікті билік өкілдері қарсы алды. Аида Ғалымқызы мен Шалқар Заманбекұлының бұл жолғы сапарының мақсаты — Жидебайдағы Абайдың қорық-мұражайын дамыту бойынша бірқатар өзекті мәселелерді талқылау болатын.
Аида Балаева Жидебай жеріндегі Абай қорық-мұражайы республикалық деңгейдегі іргелі тарихи-мәдени нысан болғандықтан, министрлік тарапынан көңіл бөлініп, бірқатар жоспарлы шаралар қолға алынатынын, музейдің инфрақұрылымын дамытуға қолдау көрсетілетінін жеткізді. Жидебайға еліміздің әр түкпірінен келетін туристерге қолайлы жағдай жасау жөніндегі жоспарлары туралы да айтып өтті.
Абай ауданының әкімі Мейіржан Смағұлов жергілікті атқарушы билік тарапынан атқарылып жатқан іс-шаралар жайында ақпарат берді. Әкімнің сөзінше, қаңтар айында Абай ауданы әкімінің бастамасымен өткен туризм саласын дамытуға қатысты форум өз нәтижесін беруде. Сол форумнан кейін Жидебайға бұрынғыдан да көп көңіл бөлініп, туризм саласында жаңа серпіліс пайда болған.
Аудан басшысы алдағы уақытта Абай хакімнің бірнеше тілге аударылған өлеңдері мен қара сөздері көрнекіліктер ретінде қолданылатынын, музейдің инфрақұрылымы дамып, көптеген өзгерістер орын алатынын атап өтті.
Министрдің бұл сапары барысында «Абайдың «Жидебай — Бөрілі» мемлекеттік тарихи-мәдени және әдеби-мемориалдық музей-қорығы» РМҚК директорының міндетін атқарушы болып Абай ауданының тумасы Ұлан Сағадиев тағайындалды. Аида Ғалымқызы Ұлан Болатұлының жаңа қызметіне сәттілік тілеп, бірқатар тапсырмалар жүктеді.
Айта кетсек, Ұлан Болатұлы 8 жыл Абай ауданының ішкі саясат бөлімінде басшы, Шығыс Қазақстан, Абай облыстарының мәдениет басқармаларында, кейіннен ҚР Сауда және интеграция министрлігінің Алматы облысы бойынша Сауда және тұтынушылардың құқықтарын қорғау департаменті басшысының орынбасары, басшысы қызметтерін атқарған.
