Абай облысында жастар үшін шағын гранттар конкурсы – «ZHAS PROJECT» жобасы басталды. Өңірге 8 грант бөлінген. Өтінімдерді қабылдау 25 наурызда басталып, бір айға созылады. Бұл туралы конкурсты ұйымдастырушылар мен «Абай жастары» жастар ресурстық орталығының бөлім басшысы Ерсінбек Өрлеубек хабарлады.
— 19 ақпаннан 24 наурызға дейін ынталы қатысушылар үшін ақпараттық науқан өткізіледі. Ал 25 наурызда өтінімдерді қабылдау басталады. «ZHAS PROJECT» жобасы жастар арасында кәсіпкерлік дағдыларды дамытуға бағытталған. Жобаға шалғай ауылдардағы халықтың әлеуметтік осал топтары мен жастарға артықшылық бере отырып, 18-35 жас аралығындағы қазақстандықтар қатыса алады. Үздік әлеуметтік жобаларды конкурстық комиссия таңдайды. Алғашқы қадам, өтініш беру – идеяны анықтау, сайтта сауалнама толтыру www.zhasproject.com, құжаттарды тіркеп, бюджет құрып, шағын гранттар конкурсына қатысуға өтінім бересіз, – деп нақтылады Zhas Project жобасының үйлестірушісі Эльзира Жүнісова.
Конкурс талаптарына сәйкес үміткерлер аймақта тұратын жұмыссыз жастар болуы керек. Жоба жеңімпаздары 1 миллион теңгеге дейін қаражатқа және тәлімгерлердің қолдауына ие болады. Жастарға жобаларын іске асыруға төрт ай беріледі.
Спикерлердің айтуынша, шағын гранттарды іске асыру барысында жастарға ұйымдастырушылық және консультациялық қолдау көрсетілетін болады. Сондай-ақ білікті жаттықтырушылар, тәлімгерлер және әлеуметтік жобаларды дамыту жөніндегі мамандар шақырылады.
