Абай облысының әкімі Нұрлан Ұранхаев жаңадан құрылған Мақаншы ауданына арнайы жұмыс сапарымен барып, аудан активімен кездесу өткізді.
Қуаныш ЖОЛЫМБЕТ,
«Semey tany»
Облыс басшысы ҚР Президенті Әкімшілігінің, Мақаншы ауданының мәслихат депутаттарының келісімімен және облыс әкімінің өкімімен, Мақаншы ауданының әкімі лауазымына тағайындалған Дәурен Бақытжанұлы Қойгельдинді таныстырды.
Дәурен Бақытжанұлы — мемлекеттік қызмет саласындағы тәжірибесі жеткілікті, білікті маман. ҚР Президенті жанындағы Мемлекеттік басқару академиясының түлегі. Еңбек жолын Көкпекті аудандық мәслихатында бас маман ретінде бастап, мемлекеттік қызметтің барлық баспалдағынан кезең-кезеңімен өткен. Дәурен Қойгельдин ауылдық округ әкімі қызметін де атқарған. Тағайындалғанға дейін Көкпекті ауданы әкімінің орынбасары болды.
— Мемлекеттік қызметтегі тәжірбиесі мен білімі жеткілікті. Сондықтан артылған сенімді ақтап, алдағы уақыттарда жаңадан құрылған Мақаншы ауданының жұртшылығымен бірлесе отырып, осы ауданның дамып, гүлденуіне бар күш-жігерін салып, аянбай қызмет етеді деп сенемін, — деді облыс әкімі Нұрлан Телманұлы.
Аудан активімен кездесуде араға ширек ғасырдан астам уақыт салып қайтадан құрылған Мақаншы ауданының әлеуметтік-экономикалық әлеуеті мен алдағы уақыттарда атқарылуы тиіс жоспарлы іс-шаралар жайында сөз қозғалды.
Сөз ретінде айта кетсек, қазіргі таңда аудан құрамына 11 ауылдық округ — Ақшоқы, Келдімұрат, Бақты, Мақаншы, Көктал, Қаратал, Қарабұлақ, Қарабұта, Көктерек, Қабанбай, Қаратұма және 18 шағын елді мекен кіреді. Халық саны 26,6 мың адамды құрайды, аудан аумағының жалпы ауданы — 800 мың гектар.
Ауданның экономиканың негізгі бағыттары — тау-кен өнеркәсібі, ауыл шаруашылығы және туризм саласындағы әлеуеті жоғары. Бүгінде аудандағы Жалаңашкөл ауылында «Фирма Мадина» ЖШС көмір өндіру өнеркәсіптік кәсіпорны жұмыс істейді.
