Аймақ басшысы Нұрлан Ұранхаевтың төрағалығымен Абай облысының көп балалы және аз қамтылған отбасылардың мәселелерін шешу жөніндегі қоғамдық жұмыс тобы мен Әйелдер істері және отбасылық-демографиялық саясат жөніндегі өңірлік комиссияның бірлескен отырысы өтті.
Күн тәртібінде көп балалы отбасылармен жұмыс жүргізетін аудандық комиссиялардың атқарған жұмыстары, сирек кездесетін дертке шалдыққан науқастарға әлеуметтік көмек көрсету, балалар үйі түлектерін әлеуметтендіру мәселелері қаралып, көп балалы отбасылар тарапынан көтерілген мәселелер талқыланды. Әсіресе сирек (орфанды) кездесетін аурулармен ауыратын науқастарға әлеуметтік көмек көрсету мәселесіне көп көңіл бөлінді.
Жиында айтылғандай, өткен жылы жергілікті атқарушы орган қаражаты есебінен 21 бала, нақтырақ айтсақ Целиакия дертіне шалдыққан 9 бала, муковисцидоз диагнозы қойылған 10 бала және «көбелек балалар» дертіне шалдыққан 2 бала арнайы тамақпен және медициналық бұйымдармен қамтамасыз етілген. Қазіргі таңда аудандардағы 8 баланы дәрілік препараттармен және тамақпен қамтамасыз етуге 21 млн теңгеден астам қаржы қажет болса, Семей қаласындағы 20 баланың қажеттілігі 52 млн теңгені құрайды. Ағымдағы жылы 43 науқасқа қаражат бөлу жоспарланған.
Отырыста сонымен қатар балалар үйі түлектерінің мәселелері қаралды. Былтырғы оқу жылында орта және негізгі мектептерді бітірген 36 тәрбиеленуші колледждер мен жоғары оқу орындарына түскен. ҚР Үкіметінің қаулысына сәйкес, түлектер жатақхана, тамақтану, киім-кешек, оқулықтар және медициналық көмекпен қамтамасыз етіледі. Бүгінде облыс көлемінде тұрғын үйге мұқтаж азаматтардың тізімінде 2833 жетім бала және 0-ден 29 жасқа дейінгі ата-анасының қамқорлығынсыз қалған балалар бар.
Өңірде 20 464 көп балалы ана тұрады, оның 7409-ы — «Алтын алқа», «Күміс алқа» төсбелгілерімен, I және II дәрежелі «Ана даңқы» ордендерімен марапатталған және «Батыр ана» атағын алғандар. Ал 13 055-і төрт және одан да көп бала тәрбиелеп отыр. Көп балалы отбасылар үшін балалардың санына байланысты жәрдемақылар қарастырылған. Сонымен қатар биыл 8 Наурыз — Халықаралық әйелдер мерекесіне орай көп балалы аналарға 15 000 теңге көлемінде бір реттік жәрдемақы төлеу жоспарланған.
Жиын барысында Нұрлан Ұранхаев басқарма басшыларына тиісті тапсырмалар берді. Жүргізіліп жатқан барлық жұмыстар облыс әкімінің жеке бақылауында тұр.
Абай облысы әкімдігінің баспасөз қызметі
