Семей қаласындағы физика-математика бағытындағы Назарбаев Зияткерлік мектебінің 11 сынып оқушысы Әділет Казкеев халықаралық конференцияға қатысып жүлделі оралды. Катар мемлекетінің астанасы Доха қаласында өткен ХІХ БҰҰ Моделінде (MUN conference) шәкіртіміз Honorable Mention марапатына ие болды.
— Халықаралық мектептер оқушылары қатысатын конференцияны жыл сайын Джордтаун Университеті ұйымдастырады. Еркін пікір сайыс алаңында оқушылар әлемде орын алып жатқан түрлі тақырыптарды талқылап, проблемаларды шешу жолдарын қарастырады. Мәселен мен бағымды сынаған БҰҰ Бас Ассамблеясы (United Nations General Assеmbly) комитетінде «Конго Демократиялық Республикасындағы колтан өндірудің әлеуметтік-экономикалық әсерін шешу», «Йемендегі ауылдық қауымдастықтың экономикалық мүмкіндіктерін кеңейту» тақырыптарында өз ұстанымдарымды ортаға салдым. Нәтижесінде жүлделі ІІ орынға ие болдым, -дейді шәкіртіміз Әділет Казкеев.
Семейлік зияткер ұтып алған Honorable Mention марапаты жүлделі ІІ орынмен пара-пар. Мектеп намысын абыроймен қорғап келген Әділет Казкеев жеткен жетістігін алдағы уақытта жақсартуды көздеп отыр.
Семей қаласындағы физика-математика бағытындағы
Назарбаев Зияткерлік мектебінің баспасөз қызметі
