Жуырда Абай облысы әкімінің орынбасары Шалқар Байбековтің төрағалығымен Абай облысы мәслихатының кезекті он төртінші сессиясы өтті. Сессияның күн тәртібінде тоғыз сұрақ қаралды.
Күн тәртібіндегі бірінші сұрақ бойынша ветеринария басқармасының басшысы Ержан Барышев Абай облысы аумағында ветеринарлық-санитариялық салауаттылықты қамтамсыз ету бойынша 2023 жылы жүргізілген жұмыстар туралы есеп берді. Облыстық мәслихат депутаты Шолпан Шегедекова қала көшелерінде мысық мен иттердің өлекселері көптеп жататынын айтып, басқарма басшысынан тиісті шара қолдануды өтінді.
Ержан Мұратбекұлы қала тазалығы басқарманың міндетіне кірмейтінін және бұл мәселеге әкімдік жауапты екенін жеткізді.
Депутаттар сонымен қатар иелері бар иттер мен мысықтарға сырға салып, ені жоқ жануарларды бірден жою қажет деген ұсыныс білдірді.
«Иттерді ату кезінде тазы, төбет секілді қазақы тұқымды иттерді сақтап қалу қажет. Мемлекет басшысының өзі оларды сақтап, көбейтуге тапсырма берген»,- деп атап өтті депутат Мерей Қарт.
Облыстағы техникалық және кәсіптік білім беру нысандарын күтіп ұстау және колледж түлектерін өз мамандығы бойынша одан әрі жұмысқа орналастыру бойынша жүргізіліп жатқан жұмыстар туралы білім басқармасының басшысы Нұржан Ахметқалиев баяндады. Баяндамаға орай қаладағы көлік колледжінің директоры, облыстық мәслихат депутаты Айбек Нұғымаров техникалық және кәсіптік білім беру оқу орындарының түлектері үшін де «Дипломмен ауылға» секілді жобалар қажет екенін айтып, игі бастама көтерді.
— Ауылдарда механизатор, тракторшы сынды қарапайым жұмысшы мамандықтар тапшы. Қалада керісінше қолында дипломы бар жұмыссыз жастар көп. Өкінішке орай, «Дипломмен ауылға» бағдарламасы тек ЖОО түлектеріне арналған. Біз колледж түлектеріне де қолдау көрсетуіміз қажет. Оларға да көтерме ақы төленіп, үй берілсе ауылдарда халықты тұрақтандырар едік,- деді Айбек Нұғымаров.
Халық қалаулысы Марат Құрманбаев Айбек Нұғымаровтың бастамасын қолдай отырып, мектептерде де бұрынғыдай қосымша техникалық білім беруді жандандыруды ұсынды.
Абай облысы әкімінің орынбасары Шалқар Байбеков бұл екі ұсыныс Абай облысы мәслихаты депутттары атынан хат түрінде Парламенттің қарауына жіберілетінін айтты.
Күн тәртібінде сондай-ақ қатты тұрмыстық және коммуналдық қалдықтармен жұмыс істеу бойынша 2024 жылға арналған жұмыс жоспары, Абай облысы мәслихатының «2024-2026 жылдарға арналған облыстық бюджет туралы», «Абай облысы бойынша жер комиссиясы құрамын бекіту туралы» « Абай облысының Қоғамдық кеңесінің құрамын бекіту туралы» шешімдеріне өзгерістер енгізу және өзге де мәселелер қаралды.
Негізгі отырыс аяқталған соң халық қалаулылары облыс әкімі Нұрлан Ұранхаевқа бірқаатр депутаттық сауалдарын жолдады.
