Қазақстан Республикасының президенті Қасым-Жомарт Тоқаев Атырау қаласындағы Ұлттық құрылтайда жариялаған «Наурыз» жаңа тұрғын үй бағдарламасы 25 сәуірде бастау алды. Бұл бағдарламаның операторы Отбасы Банкі болады. Бағдарламаға барлық қазақстандықтар қатыса алады. Өтінімдерді Баспана маркет бөліміне 25 сәуірден бастап беруге болады (otbasybank.kz).
Қабылдау 30 маусымға дейін жалғасады. Бастапқы жарна тұрғын үй құнының 20%-ын құрайды, тұрғын үйге кезекте тұрған азаматтардың әлеуметтік осал санаттары үшін несие мөлшерлемесі 7%, ал қалған барлық азаматтар үшін – 9% (ЖЭС 9,3% — дан 11,8% — ға дейін) болады. Несие мерзімі 19 жылға дейін. Бағдарлама 8 жылға есептелген. Осы уақыт ішінде Қазақстанның 68 000 азаматын тұрғын үйімен қамтамасыз ету жоспарлануда. Биыл 12 мың қазақстандық жаңа тұрғын үй ала алады. Қазіргі уақытта біздің өңір бойынша 173 өтінім қабылданды.
«Наурыз» бағдарламасына қатысу үшін Отбасы банкінде депозит ашу қажет (ол болмаған жағдайда) және осы банктің жинақ шотындағы ақша кемінде 1 млн теңгеден кем болмауы тиіс. Сондай-ақ, бағдарламаға қатысуға ниет білдірушінің соңғы 5 жыл ішінде баспанасы болмауы маңызды.
