Абай облысының Бородулиха ауданында өнеркәсіп, ауыл шаруашылығы және инфрақұрылым салалары қарқынды дамып келеді. Өңірлік коммуникациялар қызметінде өткен баспасөз жиынында аудан басшылығы өткен жылғы атқарылған жұмыстарды қорытындылап, алдағы жоспарларымен бөлісті.
Аудан экономикасының негізгі қозғаушы күштері – тау-кен өндірісі, өңдеу өнеркәсібі және сауда саласы. 2025 жылдың алғашқы екі айында бөлшек сауда айналымы 2,2 млрд теңгеге жетіп, көтерме сауда көлемі екі есеге артты.
Шағын және орта бизнес те аймақ экономикасының маңызды буынына айналып келеді. Бүгінде ауданда 1 531 кәсіпкерлік нысаны тіркелген. Алғашқы екі айдың қорытындысы бойынша аудан бюджетіне 702 млн теңге көлемінде салық түсіп, бұл көрсеткіш өткен жылмен салыстырғанда 7%-ға ұлғайды.
— Биыл қаңтар-ақпан айларында ауданның өнеркәсіп өндірісі 14,4 млрд теңгеге жетіп, өткен жылмен салыстырғанда 34%-ға артты. Өңір экономикасының негізін тау-кен өндірісі мен өңдеу өнеркәсібі құрайды. Сонымен қатар, негізгі капиталға салынған инвестициялар көлемі 3,3 млрд теңгені құрады, — деді Айдар Ибраев.
Ауыл шаруашылығы – аудан экономикасының негізгі бағыттарының бірі. Ауыл шаруашылығына арналған жер көлемі 475,5 мың гектарды құрайды, оның 356,4 мың гектары егістік алқаптарына тиесілі. Өткен жылы салаға 2 млрд теңгеден астам қаржы бөлініп, оның бір бөлігі тұқым, тыңайтқыштар және гербицидтерді субсидиялауға жұмсалды.
Мал шаруашылығы саласында да оң динамика байқалады. Қазіргі таңда ауданда 45 шаруашылық жұмыс істеп тұр, олардың төртеуі асыл тұқымды мал өсіруге маманданған.
