Семейде Жеңіс саябағы алаңында «Шығыс» өңірлік қолбасшылығына қарасты механикаландырылған бригаданың жас сарбаздары салтанатты түрде ант қабылдады. Сарбаздар үшін ант қабылдау рәсімі – бұл тек салтанатты шара ғана емес, сонымен қатар Отанға, халқына және мемлекеттің заңдарына адалдықтың символы. Жыл сайын еліміздің әр өңірінде өтетін бұл рәсім, жастардың әскери қызметке деген жауапкершілігін арттырумен қатар, олардың патриоттық сезімдерін нығайтады.
Көктемде шақырылып, сарбаз атанған 140 жауынгер Қостанай, Қызылорда, Алматы, Ақмола және Абай олыстарынан келгендер. Салтанатты жиында сөз алған «Шығыс» өңірлік қолбасшылығы әскерлерінің қолбасшысының орынбасары полковник Бауыржан Күренкеев, 30217 әскери бөлімінің командирі подполковник Еркін Жоламанов және сарбаздардың ата-аналары өздерінің ақжарма тілектерін жеткізіп, ант қабылдау рәсімі әскери қызметшілер үшін маңызды кезеңі болып табылатынын атап өтті.
Салтанатты жиында көпшілік алдында ант қабылдаған сарбаздар өздерінің әскери борыштарын абыроймен орындауға, Отанын қорғауға және халқына қызмет етуге дайын екендіктерін жариялады. Ант мәтініне сәйкес, олар елдің Конституциясын, заңдарын және әскери жарғыларын сақтауға, сондай-ақ, өздерінің қызметінде адал болуға уәде берді.
Айта кетейік, рәсімнің салтанатты түрде өтуі сарбаздардың моральдық-рухани тұрғыдан қалыптасуына әсер етеді. Ант қабылдау кезіне ардагерлер мен қоғамдық ұйымдардың өкілдері де қатысып, жастарға баталарын берді. Сарбаздардың ант қабылдауы – еліміздің болашағы үшін маңызды. Жастардың әскери қызметке деген қызығушылығы мен дайындығы, олардың Отан алдындағы борышын сезінуі – мемлекетіміздің қауіпсіздігі мен тұрақтылығының кепілі. Ант қабылдау рәсімі арқылы жастарға әскери міндеттің маңыздылығын түсіндіру, олардың патриоттық сезімдерін ояту – бүгінгі күннің маңызды міндеттерінің бірі.
Абай өңірлік гарнизонының баспасөз қызметі
