Абай облысының әкімі Берік Уәли жерлестеріне арнап үндеу жасап, 19-20 маусым күндері Семей қаласында өтетін «Туған жерге туыңды тік» атты инвестициялық форумға белсенді қатысуға шақырды. Бұл туралы Semeytany.kz хабарлайды.
Әкімнің айтуынша, форум – алыста жүрген абайлықтармен байланысты күшейтіп, туған жердің дамуына атсалысудың нақты қадамына айналмақ. Берік Уәли қасиетті Абай өлкесінің тарихы мен рухани салмағына тоқталып, бұл мекен әрдайым ұлты үшін еңбек еткен азаматтармен мақтанатынын атап өтті.
«Бұл аймақтан Құнанбай мен Ақтайлақ секілді ел қамын жеген билер шықты, Абайдай ғұлама туды, Алаш арыстарының ізі қалды. Тәуелсіздіктің алғашқы жылдарында қиындықты көп көрген өңіріміз бүгінде Мемлекет басшысы Қасым-Жомарт Тоқаевтың қолдауымен қайта түлеп келеді», – деді өңір басшысы.
Әкім өңірде іске асып жатқан нақты жобаларға тоқталды. Оның ішінде 75 мың тұрғынға арналған жаңа ықшамаудан құрылысы, әлеуметтік нысандар, мәдениет ошақтары, жастар сарайы, инвесторлар орталығы, көрме алаңдары мен спорттық кешендер бар. Сонымен қатар, «Абайға құрмет» акциясы аясында еліміздің өзге облыстары Абай өңірінде әлеуметтік нысандар салуға кірісіп кеткені де айтылды.
Берік Уәли форум тек бизнес өкілдері үшін емес, туған топырағына алғыс білдіргісі келетін әрбір азамат үшін маңызды алаң болатынын баса айтты. Форум аясында аймақтың әлеуеті мен мүмкіндіктері таныстырылып, бірлескен жобалар қолға алынбақ.
«Бұл – ұрпақ алдындағы аманат, ел болашағына салынар берік негіз. Абай өңірін бірге өркендетейік», – деп түйіндеді әкім.
Ерлан Айқынұлы
