Семей таңы – Абай облысында жазғы демалыс маусымында 5000-ға жуық мектеп оқушысы қала сыртындағы лагерьлерде тынығады. Бұл туралы өңірлік коммуникациялар қызметінде өткен баспасөз мәслихатында облыстық білім басқармасының тәрбие жұмысы және қосымша білім беру бөлімінің басшысы Сәуле Қожебекова мәлімдеді, деп хабарлайды Semeytany.kz тілшісі.
9 лагерь балаларды қабылдауға дайындалуда
Жаз бойы облыста 9 лагерь тұрақты жұмыс істемек. Оның 8-і – мемлекеттік, 1-еуі – жекеменшік. Жеті лагерь типтік үлгіде салынса, қалған екеуі бейімделген ғимараттарда орналасқан.
9-15 маусым аралығында алты лагерь алғашқы балаларды қабылдаса, қалған үшеуі 16-20 маусым аралығында есігін ашады. Қазіргі таңда лагерьлердің дайындығы 75 пайызға жетіп отыр.
«Барлық лагерьге күнделікті мониторинг жүргізілуде. Балалардың шомылуы бес лагерьде ұйымдастырылады. Онда балалар суға арнайы жабдықталған аймақтар мен бассейндерде педагогтердің қадағалауымен түседі», – деді Сәуле Қожебекова.
Әлеуметтік осал топтағы балалар – ерекше назарда
Әлеуметтік қолдауды қажет ететін 4713 бала «Всеобуч» қоры есебінен жазғы демалыспен тегін қамтылады. Сонымен қатар, үздік оқып, қоғамдық белсенділік танытқан 128 оқушы республикалық «Балдаурен» және «Бөбек» лагерьлеріне жолдама алады.
Ал ауылдық жерлердегі үздік 250 оқушы Алакөл жағалауындағы «Дарабоз» лагерінде демалмақ. Бұл бастамаға «Қазақстан халқына» қоғамдық қоры қолдау көрсетіп отыр.
Жөндеуден өткен лагерьлер қайта іске қосылуда
Өткен жылы Үржар ауданындағы «Тарбағатай» лагері қайта қалпына келтіріліп, онда 446 бала демалды. Ал Курчатов қаласындағы «Берег» лагері Мәдениет бөлімінен Білім бөліміне берілген. Келесі жылы Көкпекті ауданындағы «Балдаурен» лагерін қалпына келтіру жоспарланып отыр.
