Семей таңы – 2025 жылдың 1 маусымынан бастап Қазақстанда спорт, өнер және қосымша білім беру бағыттары бойынша бірыңғай ваучер жүйесі енгізілмек. Бұл жаңа пилоттық жоба Астана, Шымкент, Қарағанды, Қызылорда, Атырау және Ақтөбе қалаларында іске қосылады, деп хабарлайды Semeytany.kz тілшісі.
Мемлекет жыл сайын балалардың шығармашылық үйірмелерге, спорттық секцияларға және қосымша білім беру курстарына қатысуын қаржыландырып келеді. Алайда жүргізілген тексерулер барысында бұл салада бірқатар заңбұзушылықтар анықталған. Мәселен, балаларды жалған тіркеу арқылы статистиканы қолдан көтеру, санитарлық талаптарға сай келмейтін пәтерлер мен жертөлелерде сабақ өткізу, тіпті кей өңірлерде бұрын сотталған азаматтардың балалармен жұмыс істегені белгілі болған. Сонымен қатар, жүйеде тіркелгенімен, нақты сабақтарға мүлде қатыспаған 8 мыңнан астам бала анықталған. Бұл фактілер бюджет қаражатының мақсатсыз жұмсалуы мен алаяқтық схемалардың бар екенін көрсетеді.
Осыған байланысты, жаңа жүйе аясында ваучерлер білім беру ұйымына емес, тікелей балаға беріледі. Яғни, ата-ана өз баласына мемлекеттік немесе жекеменшік үйірме, секцияны еркін таңдай алады. Бұл бұрынғыдай кезек күту немесе қаржыландырудан айырылып қалу жағдайларын болдырмайды.
Ваучердің екі түрі болады: нысаналы ваучер – мемлекеттік мекемелер үшін, ал әмбебап ваучер – eGov.kz порталы арқылы таңдалатын ұйымдарға арналған. Әмбебап ваучер кезек тәртібімен беріледі және баланың жасы мен әлеуметтік мәртебесіне қарай сараланады.
Жаңа жүйе арқылы тек лицензияланған, инфрақұрылымы қауіпсіз, санитарлық және өрт қауіпсіздігі талаптарына сай үйірмелер мен секциялар ғана қаржыландырылады. Мұғалімдердің біліктілігі мен білім беру бағдарламасының мазмұны да жіті бақыланады. Қатысушылардың сабаққа келуі күнделікті цифрлық түрде тіркеліп отырады.
Жобаны бірнеше мемлекеттік орган бірлесіп жүзеге асырады: Мәдениет және ақпарат министрлігі шығармашылық бағытқа, Туризм және спорт министрлігі спорттық секцияларға, Оқу-ағарту министрлігі қосымша білім беру саласына, ал Цифрлық даму министрлігі техникалық сүйемелдеу мен платформа жұмысына жауапты болады.
Бұл бастама балалардың қауіпсіздігін, дамуына лайықты жағдай жасауды және мемлекеттік қаражаттың тиімді жұмсалуын қамтамасыз етуге бағытталған.
