Семей таңы – Үржар ауданында көлік инфрақұрылымын жақсарту бағытындағы жұмыстар жалғасуда. Бұл туралы аудан әкімі Ақылбек Башимбаев Өңірлік коммуникациялар қызметінде өткен баспасөз мәслихатында айтты, деп хабарлайды Semeytany.kz тілшісі.
Әкімнің айтуынша, аудандағы жолдардың жалпы ұзындығы 498 шақырымды құрайды. Оның 210 шақырымы республикалық, 288 шақырымы – жергілікті маңызы бар жолдар. Өткен жылы Үржар, Қарақол, Шолпан ауылдарының кіреберіс жолдары және бірнеше ауылішілік көше жөнделіп, жалпы 30 шақырымнан астам жол орташа жөндеуден өткен. Сондай-ақ «Үржар–Барқытбел–Қарабұйрат» бағытындағы жол құрылысы толық аяқталған.
Биыл да жол жөндеу жұмыстары жалғасады. Атап айтқанда, жергілікті маңызы бар «Жоғарғы–Егінсу» бағытындағы жол жөнделмек. Сонымен қатар, «Ауыл – Ел бесігі» бағдарламасы аясында Ақжар, Жаңа Тілек, Жанай және Қарақол ауылдарындағы 18 көшеге (ұзындығы 14 шақырым) орташа жөндеу жұмыстары басталмақ.
Ағымдағы жөндеулер Үржар, Қазымбет, Ер Қабанбай, Қарамойыл, Көкөзек ауылдарында және Сағат ауылына апаратын жолда жүргізіледі.
Жол қауіпсіздігін арттыру мақсатында Үржар, Ақжар, Науалы және тағы 10-нан астам ауылда жол белгілері орнатылады. Қазір мердігерлер бекітіліп, қажетті материалдар дайындалуда. Сонымен бірге, Үржар ауылындағы Абай мен Абылайхан көшелерінің қиылысына бағдаршам орнату жұмыстарына конкурс жарияланып, мердігер анықталуда.
