Семей таңы – Биыл 1 тамыз бен 20 қазан аралығында елімізде Ұлттық ауыл шаруашылығы санағы өтеді. Бұл туралы Өңірлік коммуникациялар қызметінде өткен баспасөз мәслихатында Ұлттық статистика бюросының Абай облысы бойынша департаментінің басшысы Берік Терлікбаев мәлімдеді, деп хабарлайды Semeytany.kz тілшісі.
Ауыл шаруашылығы санағы – еліміздің агросекторының құрылымы, ресурстары мен жағдайы туралы нақты деректер жинауға бағытталған ауқымды статистикалық шара. Ол Мемлекет басшысының тапсырмасымен және Үкімет қаулысына сәйкес өткізіледі. Санақ мерзімі – 2025 жылғы 1 тамыздан 20 қазанға дейін. Бұл уақыт ауыл шаруашылығы маусымының ерекшеліктеріне сай таңдалған.
Спикердің айтуынша, дайындық жұмыстары 1,5 жыл бұрын басталған. Үкімет жанынан арнайы комиссия құрылып, тиісті заңнамалық база бекітілген. Сонымен қатар, БҰҰ Азық-түлік және ауыл шаруашылығы ұйымымен және бірнеше шетелдік елдердің статистика органдарымен тәжірибе алмасу үшін кеңестер өткізілген.
Санақ екі кезеңнен тұрады. Бірінші кезеңде, яғни 2025 жылдың 1–31 тамызы аралығында, sanaq.gov.kz порталы арқылы онлайн сауалнама жүргізіледі. Мұнда заңды тұлғалар, фермерлік және жеке қосалқы шаруашылықтар ЭЦҚ, QR-код немесе SMS арқылы тіркеліп, сауалнаманы өздері толтыра алады. Ал 20 қыркүйек пен 20 қазан аралығында интервьюерлер үйлерді аралап, онлайн қатыспаған респонденттерден мәлімет жинайды.
Санақ алдындағы дайындық шеңберінде биылғы 1–30 маусым аралығында Аягөз, Шар және Курчатов қалаларында жеке қосалқы шаруашылықтарды аралау (листинг) жұмыстары өтеді. Бұл кезде сауалнамаға жататын нақты үй шаруашылықтарының тізімі жасақталады.
Абай облысы бойынша 65 412 үй шаруашылығы мен 11 059 ауыл шаруашылығы өндірушісі санаққа қамтылады деп жоспарланып отыр. Бұл жұмыстарға 148-ден астам интервьюер тартылмақ.
