Семей таңы – Биылғы Құрбан айт мерекесі 6 маусымда басталады. Бұл туралы Абай облысының өңірлік коммуникациялар қызметінде өткен баспасөз мәслихатында облыстың бас имамы Асқар қажы Әбітайұлы мәлімдеді, деп хабарлайды Semeytany.kz тілшісі.
Бас имамның айтуынша, мұсылман әлемі қазір қасиетті Зулхижжа айында. Бұл айдың алғашқы он күні ерекше сауапқа толы күндер саналады. 5 маусым – Арапа күні. Ал 6 маусымда таңғы сағат 07:00-де облыс мешіттерінде Айт намазы оқылады. Құрбан шалу үш күнге созылады және жағдайы келген әр мұсылманға бұл – міндет.
Мал бағаларына келсек, биыл ешкі – 45 мың, қой – 80 мың, ірі қара – 560 мың теңге болып белгіленген. Құрбан шалуға байланысты қасапшылар еңбегі, қасапхана қызметі, етті жіліктеп дорбаларға салу және мұқтаж жандарға тарату жұмыстары мешіт тарапынан тегін ұйымдастырылады. Сонымен қатар, Зекет және қайырымдылық қорының Абай облыстық филиалы арқылы құрбандыққа арнайы мал жеткізіледі. Мұқтаж отбасылардың тізімі алдын ала бекітіліп, еттер белгіленген уақытта рет-ретімен үлестіріледі.
Абай облысы бойынша санитарлық талаптарға сай мал союға арналған арнайы орындар да бекітілді. Бұл туралы Санитариялық-эпидемиологиялық бақылау департаментінің өкілі Айгерім Мұсатаева мәлімдеді. Оның айтуынша, Семей қаласында тірі малдар СЛО «Северный», СЛО «Jolaman» және «SAIKAN AGRO» базарларында сатылады. Ал мал союға арналған рұқсат етілген нүктелер – «SAIKAN AGRO» ЖШС, «Семей Вет» ЖШС және «Jolaman» қасапханалары.
Маман үй жағдайында дайындалатын тағамдарға да ерекше назар аударуға шақырды. Азық-түліктің жарамдылық мерзімі мен санитариялық тазалығы сақталмаса, тұрғындар арасында ішек инфекциялары мен улану қаупі жоғары екенін ескертті.
