Семей таңы – Семей қаласында «Қауіпсіз балалық шақ – құқықтық мәдениеттің бастауы» атты форум өтті. Абай облысы әкімдігінің бастамасымен ұйымдастырылған бұл жиынға мұғалімдер, құқық қорғау органдарының қызметкерлері, қоғамдық ұйымдар, жергілікті билік өкілдері мен мектеп оқушылары қатысты. Форумда балалар мен жасөспірімдердің құқықтық санасын қалыптастыру, олардың қауіпсіз ортасын қамтамасыз ету мәселелері жан-жақты қаралды, деп хабарлайды Semeytany.kz тілшісі.
Абай облысы білім басқармасы басшысының орынбасары Әсем Нүскенова форумның басты мақсаты – ересектер мен балалар арасында ашық диалог орнатып, нақты мәселелерді талқылау екенін атап өтті. Оның айтуынша, мұндай кездесулерде оқушылардың өз пікірін ашық білдіруі аса маңызды. Бұл арқылы олардың дауысы естіліп, проблемаларды шешудің тиімді жолдары нақтыланбақ.
Alikhan Bokeikhanov University проректоры Айрат Базенов қазіргі оқушылар бетпе-бет келіп отырған қауіптерге тоқталып, әсіресе денсаулық пен психологиялық тұрақтылықты сақтау мәселесін көтерді. Ол қозғалыс белсенділігінің азаюы, гаджеттерге тәуелділік, фастфудқа әуестік секілді факторлардың жас ұрпақтың денсаулығына әсерін атап өтіп, кибербуллинг пен жасөспірімдер арасындағы суицидке алаңдаушылық білдірді.
Өңірлік коммуникациялар қызметінің басшысы Жадыра Мұратбекова ақпараттық-ағартушылық шаралардың маңызына тоқталды. Ол жыл басынан бері Білім басқармасымен бірлесіп 50-ден астам іс-шара өткізілгенін және «DaraLike» жобасы аясында дарынды балалармен жүйелі жұмыс жүргізіліп жатқанын жеткізді.
Форум аясында өткен панельдік сессиялар мен пікірталастарда құқық қорғау органдарының өкілдері, психологтар мен педагогтар өзара тәжірибе алмасып, нақты ұсыныстарын ортаға салды. Балалардың өздері де сөз сөйлеп, күнделікті өмірде кездесетін қиындықтар туралы ойларымен бөлісті. Олар киберқауіптер, психологиялық қысым және үлкендердің тарапынан көрсетілетін қолдау жөнінде ашық пікір айтты.
Бұл форум – балалардың дауысы естіліп, олардың мүддесін қорғауға бағытталған нақты қадам. Шара қорытындылары аймақтық деңгейде жаңа ағартушылық бағдарламалар мен жобаларды жоспарлауда ескерілетін болады.
