Семей таңы – Облыс әкімі Берік Уәли Абай ауданында болып, Абай Құнанбайұлының 180 жылдық мерейтойына орай атқарылып жатқан дайындық жұмыстарымен танысты, деп хабарлайды Semeytany.kz тілшісі.
Сапар барысында аймақ басшысы ең алдымен Жидебайдағы «Абай-Шәкәрім» кесенесіне барды. 2020 жылы ақынның 175 жылдығына орай кешенде реставрациялық және абаттандыру жұмыстары жүргізілгенімен, бүгінде амфитеатр мен кесененің төменгі бөлмелері жөндеуді қажет етеді. Осыған байланысты облыс әкімі Мәдениет және ақпарат министрлігінің өкілдерімен кездесіп, алдағы жөндеу жұмыстарының нақты мерзімін сұрады.
Абайдың 180 жылдығына арналған негізгі салтанатты іс-шаралар Абай ауданында өтеді. Солардың бірі – «Жеті қазына» атты ұлттық мәдениет, спорт және туризм фестивалі. Бұл шара Қарауылтөбе аумағында ұйымдастырылады. Мұнда ашық дала сахнасы, ат жарысына арналған шеңбер, 400 орындық көрермен мінбері, киіз үйлер қалашығы мен кәсіпкерлерге арналған 2500 шаршы метрлік сауда аймағы дайындалып жатыр. Су мен жарық тартылып, жаяу жүргіншілер жолдары жөнделуде. Қосымша жолдар да салынады.
Жергілікті билік өкілдері мен жауапты басқарма басшылары мерейтойға дайындық барысы жайында облыс әкіміне толық баяндама жасады.
Берік Уәли сондай-ақ Қарауыл ауылындағы Абай саябағына барды. 2020 жылы салынған бұл демалыс орны биылғы мерейтой аясында жөндеуден өтеді. Саябақта серуен жолдары, спорт алаңдары, субұрқақтар, самалжайлар мен әлеуметтік инфрақұрылым бар. Сапар аясында аймақ басшысы ауыл тұрғындарымен бірге ағаш көшеттерін отырғызуға қатысты.
Сонымен қатар, Берік Уәли мерейтой өтетін негізгі орындардың бірі – Абай алаңы мен стадионға барып, дайындық барысын көрді.
«Осыдан үш ай бұрын, 22 ақпанда арнайы келіп, 180 жылдық мерейтойға не қажет екенін нақты анықтап кеткенбіз. Содан кейін облыс бюджетін қайта қарап, қажетті қаражат бөлінді. Қазір Жидебайға антенналық құрылғы орнату, жол жөндеу секілді жұмыстар жүріп жатыр. Бұл – республика көлеміндегі маңызды мереке. Шетелден де қонақтар келеді. Сондықтан дайындықты жоғары деңгейде өткізу – басты міндет. Бүгін бөлінген қаражаттың қалай игеріліп жатқанын өз көзіммен көруге келдім. Жоспарға сай жұмыс жүріп жатыр. Бұл бағыттағы жұмыстарды жалғастыру керек», – деді облыс әкімі.
Абайдың 180 жылдығы ел руханияты мен мәдениеті үшін маңызды кезеңдердің бірі болмақ. Мерекелік шараларды сапалы өткізу – өңір беделін көтеріп қана қоймай, ұлы ойшылдың мұрасын халықаралық деңгейде насихаттауға жол ашады.
