Семей таңы – Абай облысының әкімі Берік Уәли Абай ауданына қарасты Саржал ауылында болып, жаңадан пайдалануға берілген дәрігерлік амбулаторияны аралады, деп хабарлайды Semeytany.kz тілшісі.
Ауылдық медициналық мекеме биыл «Ауылдық денсаулық сақтауды жаңғырту» ұлттық жобасы аясында іске қосылған. 13 бөлмеден тұратын амбулаторияда 10-ға жуық маман жұмыс істейді. Заманауи құрал-жабдықтармен қамтылған мекеме 1600-ден астам тұрғыны бар ауыл халқына сапалы қызмет көрсетіп отыр. Сонымен қатар, 56 қыстақтағы тұрғындарға, соның ішінде балалар мен әйелдерге тұрақты медициналық бақылау жүргізілуде. Ауылда 35 жылдық тәжірибесі бар жоғары санатты дәрігер еңбек етеді.
Аймақ басшысы амбулатория жұмысымен танысып болған соң ауыл ақсақалдары мен медицина қызметкерлерімен кездесті. Кездесу барысында Берік Уәли Саржалдың болашағы зор екенін атап өтті.
«Саржал – қымызымен бүкіл республикаға танымал, ынтымағы жарасқан үлгілі ауыл. Халық саны артып келеді. Алдағы уақытта ауылға спорттық модуль салу жоспарда бар. Аудан басшысы мердігердің жұмысын қатаң бақылауы тиіс. Шалғай ауыл тұрғындарына қолайлы жағдай жасау – біздің міндетіміз», – деді облыс әкімі.
Саржал – негізінен мал шаруашылығына бейім ауыл. Мұнда 74 шаруа қожалығы жұмыс істейді. Жергілікті тұрғын Секен Ибраев:
«Сары қымыз сапырған ауылмыз ғой. Күніне 2 тоннаға дейін қымыз өндіреміз. Ауылымыз көркейіп келеді. Былтыр аудан бойынша үздік ауыл атандық. Көшелерімізге асфальт төселіп, қаладан көшіп келушілер көбейіп жатыр. Бұл – ауылда жағдайдың жақсы екенінің белгісі. Ауылымызға арнайы келіп, жағдайымызды көріп, көңіл бөлгеніңіз үшін алғыс білдіреміз», – деді.
Саржалдағы тың серпін мен инфрақұрылымға бағытталған жаңа жобалар ауыл тұрғындарының өмір сапасын арттыруға бағытталып отыр.
