Семей таңы – Үржар ауданындағы әуежайға алғаш рет SCAT әуе компаниясының «CRJ-200» жолаушылар ұшағы қонды. Бұған дейін тұрғындар ескі АН-24 ұшағымен қатынаса, енді «Үржар–Алматы» және «Үржар–Астана» бағыттары бойынша күн сайын тұрақты рейстер орындалады, деп хабарлайды Semeytany.kz тілшісі.
Бұл жаңалық жергілікті тұрғындармен қатар Алакөл мен өңірдің басқа да туристік нысандарына баратын қонақтар үшін қолайлы жағдай туғызады. Рейстер мемлекет тарапынан субсидияланғандықтан, билет бағасы да қолжетімді болады. Канадада шығарылған «CRJ-200» ұшағы 50 жолаушыға лайықталған, жайлы әрі өңіраралық бағыттарға тиімді.
Жаңа бағыттар Үржар ауданының туристік әлеуетін арттыруға серпін береді. Биыл туристік маусымға дайындық қарқынды жүргізіліп жатыр. Облыс әкімі Берік Уәлидің қолдауымен Алакөл жағалауын абаттандыруға 658 миллион теңге бөлінген.
Қазір 2018 жылдан бері жөндеу көрмеген Арбат аумағында жаңарту жұмыстары жүріп жатыр. Жағалаудағы ескірген темір қоршаулар жаңартылып, 5 шақырымға жуық жолға асфальт төселеді. Сондай-ақ 10 модульді, 15 биодәретхана, 40-тан астам киім ауыстыратын кабина, қоқыс жәшіктері мен бейнебақылау камералары орнатылады. Қауіпсіздікті күшейту және туристерге жайлы орта қалыптастыру мақсатында пирс пен қалқыма платформалар салынбақ.
Сонымен қатар, туристердің көп шоғырланатын Арбат аумағындағы жүктемені азайту үшін жаңа қоғамдық кеңістік салынады. Онда 100 адамға арналған сауда аймағы, үлкен сахна, субұрқақ және арнайы серуен аймағы қарастырылған.
Жаңа әуе бағыты мен жағалаудағы инфрақұрылымдық өзгерістер Үржар өңірін еліміздің ірі туристік орталықтарының біріне айналдыруға бағытталған нақты қадам болып отыр.
