Семей таңы – Облыс әкімі Берік Уәлидің төрағалығымен кеңейтілген аппараттық кеңес өтті. Жиында өңір базарларын жаңғырту, мүмкіндігі шектеулі азаматтар үшін инфрақұрылымды бейімдеу және Құрбан айт мерекесін ұйымдастыру мәселелері қаралды. Кеңес жұмысына басқарма басшылары мен департамент жетекшілері офлайн қатысып, аудан және қала әкімдері бейнебайланыс арқылы қосылды, деп хабарлайды Semeytany.kz тілшісі.
Базарларды жаңғырту мәселесі бойынша облыстық кәсіпкерлік және индустриялық-инновациялық даму басқармасының басшысы Айбек Рахымбеков баяндама жасады. Оның айтуынша, өңірде 23 базар жұмыс істейді, оның 12-сі Семей қаласында орналасқан. Қазіргі таңда екі ірі сауда орны бойынша жобалық-сметалық құжаттама әзірленіп жатыр. Заң талаптары мен Президент Әкімшілігінің тапсырмасына сәйкес, бұл нысандар жаңғыртуға жатады. Аймақ басшысы қала әкіміне және полиция департаментіне базар иелерімен кездесіп, түсіндіру жұмыстарын жүргізуді және жаңғыртуды жедел бастау жөнінде тапсырма берді.
Кеңесте мүмкіндігі шектеулі азаматтар үшін әлеуметтік инфрақұрылымды бейімдеу мәселесі де көтерілді. Бұл бағытта атқарылып жатқан жұмыстар жайлы облыстық жұмыспен қамту және әлеуметтік бағдарламаларды үйлестіру басқармасының басшысы Айман Нұрлыбекқызы мәлімдеді. 2025 жылға дейін 206 нысанды бейімдеу жоспарланған. Бүгінде 38 нысан бейімделіп, қолжетімді орта талаптарына сай келтірілген.
Облыс әкімі бұл бағыттағы жұмыстың баяу жүріп жатқанын сынға алып, жоспарды тиісті деңгейде орындамаған Жарма және Үржар аудандары әкімдерінің осы салаға жауапты орынбасарларының жауапкершілігін қарауды тапсырды.
«Өңірде 24 мыңнан астам мүмкіндігі шектеулі азамат тұрады. Оның 13 630-ы Семейде. Бұл – үлкен жауапкершілік. Бейімдеу тек мемлекеттік нысандармен шектелмеуі керек. Жеке меншік мекемелермен де түсіндіру жұмыстарын жүргізіп, оларды да осы іске тартуымыз қажет», – деді Берік Уәли.
Кеңесте Құрбан айт мерекесін өңірде ұйымдастыру мәселесі де сөз болды. Семейде мал союға арналған үш орын, ал аудан орталықтарында бір-бірден арнайы нысан белгіленген. Облыс әкімі санитарлық-ветеринарлық талаптар мен өрт қауіпсіздігін сақтау, мал саудасын тек рұқсат етілген жерлерде жүргізу қажеттігін еске салып, халыққа ақпарат беру үшін арнайы баспасөз мәслихатын өткізуді тапсырды.
