Семей таңы – Абай облысында кәмелетке толмағандар арасындағы құқықбұзушылықтың алдын алу бағытында кешенді шаралар жүргізіліп жатыр. Бұл туралы Өңірлік коммуникациялар қызметінде өткен брифингте облыстық Полиция департаменті Жергілікті полиция қызметі басқармасы бастығының орынбасары Бауыржан Садақбаев мәлімдеді, деп хабарлайды Semeytany.kz тілшісі.
Спикердің айтуынша, мектептер мен колледждерде, жоғары оқу орындарында құқықтық сауаттылықты арттыру мақсатында 2164 лекция ұйымдастырылған. Сонымен қатар интернет желілерінде 884 ақпараттық материал жарияланып, «Құқық тәртібі», «Жасөспірім», «Антибуллинг» секілді ірі профилактикалық акциялар өткізілген.
Полиция тарапынан түнгі уақытта заңды өкілінсіз жүрген 1988 жасөспірім анықталған. Нәтижесінде 170 ата-ана немесе заңды өкіл әкімшілік жауапкершілікке тартылған. Ал көңіл көтеру орындарында жасөспірімдердің болуына жол берген 45 мекеме иесіне де тиісті шара қолданылған.
Қазіргі таңда тәртібі нашар, түрлі құқықбұзушылыққа бейім 64 жасөспірім ювеналды тіркеуге алынып, мінез-құлқы жіті бақылауға алынған. Бұл бағыттағы жұмыс облыс көлемінде жалғаса бермек.
Жауапты органдардың мәлімдеуінше, жасөспірімдердің құқықтық санасын арттыру, оларға заңға сай өмір сүрудің маңызын түсіндіру – құқықбұзушылықтың алдын алудың басты құралы.
