Семей таңы – Абай облысында биылғы жылдың бірінші жартыжылдығында 226 нысан ресми түрде пайдалануға қабылданды. Бұл туралы Өңірлік коммуникациялар қызметінде өткен баспасөз мәслихатында облыстық мемлекеттік сәулет-құрылыс бақылау басқармасының басшысы Сайлау Байназаров мәлімдеді, деп хабарлайды Semeytany.kz тілшісі.
Спикердің айтуынша, құрылыс нысандарын тіркеу және қабылдау рәсімдері бойынша биылғы алты айда 620 өтініш қаралып, оның 226-сы бойынша нысандар пайдалануға берілген. Ал өткен жылы 464 өтініштің 193-і мақұлданған.
«Бұл – бақылау мен заңдастыру рәсімдерінің күшейгенінің нақты көрінісі. Құрылысты заң аясында жүргізуге басымдық берілуде», – деді басқарма басшысы.
Сондай-ақ, басқармаға келіп түскен 320 арыз бен хаттың 273-і оң шешімін тапқан.
Құрылыс саласындағы заңбұзушылықтардың алдын алу мақсатында жыл басынан бері жоспардан тыс 15 нысан тексеріліп, 8,99 млн теңге көлемінде айыппұл салынған. 5 нысан сотқа жолданған. Ал 2023 жылы 37 тексерудің нәтижесінде 22 млн теңге бюджетке өндіріліп, 10 нысан сотқа берілген.
Заңдылықты қамтамасыз ету мақсатында басқарма құқық қорғау және қаржы мониторингі органдарымен бірлесіп жұмыс жүргізуде. Биыл облыстық және көлік прокуратурасымен, сондай-ақ ішкі мемлекеттік аудит департаментімен 9 нысанға тексеру жүргізілген.
Мемлекеттік сәулет-құрылыс бақылауының күшеюі өңірдегі құрылыс саласының ашықтығы мен сапасына оң ықпал етуі тиіс.
