Семей таңы – 4 маусым – Қазақстан Республикасының Мемлекеттік рәміздері күніне орай Абай облысында мерекелік іс-шаралар басталды. Негізгі шаралар Семей қаласында өтіп, орталық алаңда Мемлекеттік Ту көтеру рәсімімен айшықталды, деп хабарлайды Semeytany.kz тілшісі.
Салтанатты жиынға облыс әкімі Берік Уәли қатысып, мемлекеттік органдар мен қоғамдық ұйымдардың өкілдері, ардагерлер, әскерилер, жастар, білім, мәдениет және спорт саласының қызметкерлері де жиналды.
Шара аясында өңірдің барлық қала және аудан орталықтарында бір мезгілде Мемлекеттік Ту көтерііліп, Әнұран орындалды. Семейдегі мерекелік жиынға екі мыңға жуық адам қатысты. Жиналған жұртшылыққа жергілікті өнерпаздар патриоттық әндерден тұратын концерттік бағдарлама ұсынды.
Сонымен қатар, Мемлекеттік рәміздер күніне орай қалада велошеру ұйымдастырылып, оған 30-ға жуық адам қатысты.
Айта кетейік, биыл Абай облысында рәміздер күніне арналған 100-ден астам іс-шара өткізу жоспарланған. Мақсат – елдік пен бірлікті дәріптеп, мемлекеттік рәміздерге деген құрметті арттыру.
