Семей таңы – Жазғы оқу кезеңіне сәйкес Абай облысындағы әскери бөлімдерде жауынгерлік дайындықты тексеру мақсатында дабыл көтеру жаттығулары өткізілді. Атап айтқанда, «Шығыс» өңірлік қолбасшылығына қарасты Абай гарнизонының механикаландырылған бригадасы таңғы сағат 6:00-де жауынгерлік дабылмен оянып, санаулы минуттар ішінде толық дайындыққа келтірілді, деп хабарлайды Semeytany.kz тілшісі.
Шұғыл түрде ұйымдастырылған бұл оқу-жаттығу әскери қызметшілердің нақты әскери жағдайларға әзірлігін арттыруға бағытталған. Мұндай сәттерде бөлімше командирлері жылдам шешім қабылдап, жеке құрамды басқаруға кіріседі. Қызметкерлер белгіленген орындарға жиналып, қару-жарақ пен техника толық тексерістен өтеді, қажетті жабдықтар дайындалады.
Мамандардың айтуынша, мұндай жаттығулар тек техникалық дайындықты емес, әскери бөлімнің моральдық-психологиялық ахуалын да сынайды. Жауынгерлердің сенімділігі, тәртібі мен тәртіпке бағынуы, ал командирлердің жедел шешім қабылдау қабілеті дайындықтың табысты өтуіне тікелей әсер етеді.
Абай өңірлік гарнизонының баспасөз қызметінің мәліметінше, мұндай жаттығулар алдағы уақытта да жалғасады. Жауынгерлік дабыл – бөлімшенің кез келген сәтте шұғыл әрекет етуге толық дайын екендігін көрсететін маңызды көрсеткіш саналады.
