Семей таңы – Абай облысындағы «Шығыс» өңірлік қолбасшылығына қарасты әскери бөлімдерде 2025 жылғы жазғы оқу кезеңі ресми түрде басталды. Дәстүрге сай жаңа оқу маусымының ашылуы өңірлік қолбасшылық штабы базасында өткізілді, деп хабарлайды Semeytany.kz тілшісі.
Салтанатты шара барысында өңірлік қолбасшылықтың басшысы, генерал-майор Жеңіс Маралов әскери қызметшілерді жаңа оқу кезеңінің басталуымен құттықтап, алдағы жартыжылдықтағы қызметтеріне сәттілік тіледі. Сонымен қатар, ол әскери құраммен мемлекеттік-құқықтық дайындық сабағын өткізді.
Сабақ барысында Қазақстан Республикасының әскери қызметкерлері үшін маңызды ұстанымдар – патриотизм, әскери антқа адалдық, ел бірлігі мен тұтастығы мәселелері көтерілді. «Біртұтас ел – біртұтас жер» қағидатының мазмұны мен мәні жеке құрамға кеңінен түсіндірілді.
Жазғы оқу кезеңіне арналған нақты жауынгерлік тапсырмалар нақтыланып, әскери даярлық жоспары бойынша алда тұрған міндеттер айқындалды. Сонымен қатар, сабақта мемлекет басшысының бастамасымен жүзеге асырылып жатқан елдің саяси, әлеуметтік-экономикалық және әскери-техникалық даму бағыттары туралы кеңінен ақпарат берілді.
Жиын соңында генерал-майор Жеңіс Маралов жеке құрамды жігерлікпен, жауапкершілікпен қызмет атқаруға шақырып, оқу кезеңін сапалы өткізуге сенім білдірді.
Абай өңірлік гарнизонында жазғы оқу кезеңі әскери тәртіпті күшейтіп, кәсіби даярлықты арттыруға бағытталған маңызды кезең саналады.
