Semeytany.kz – 1 маусым – Халықаралық балаларды қорғау күніне орай Абай гарнизонында орналасқан әскери бөлімдерде ауқымды іс-шаралар ұйымдастырылды. Мерекелік күнге орай алғаш рет Абай гарнизонының әуе базасында ашық есік күні өтті. Бұл бастаманың басты мақсаты – балалардың бойында әскери-патриоттық рух қалыптастырып, олардың Отан қорғаушылар еңбегімен танысуына мүмкіндік жасау.
Іс-шара аясында 54853 және 44736 әскери бөлімдері балғындарға көтеріңкі көңіл-күй сыйлап, ұмытылмас әсер қалдырды. Балалар ұшу алаңында әскери техника мен қару-жарақ түрлерінің көрмесін тамашалап, сарбаздардың күнделікті қызметімен танысты. Сондай-ақ, тікұшақтар мен атыс қаруларының заманауи үлгілері таныстырылып, бүлдіршіндер мен оқушыларға олардың құрылымы мен қолданылуы жайлы ақпарат берілді.
– Халықаралық балаларды қорғау күні – бұл тек мереке ғана емес, қоғам үшін балалардың бақытты, қауіпсіз және патриоттық рухта тәрбиеленуінің маңыздылығын еске салатын күн. Біз бүгінгі іс-шара арқылы балаларға мерекелік көңіл-күй ғана емес, Отан қорғаушыларға деген құрмет пен сенім де сыйлағымыз келді. Шараға екі жүзге жуық бала қатысты. Түрлі байқаулар ұйымдастырылды. Балалар да, ата-аналар да дән риза, – дейді 54853 әскери бөлімінің командирі, полковник Азамат Базылов.
Мерекелік күн барысында бүлдіршіндерге тәттілер мен сыйлықтар таратылып, көңілді концерттік бағдарлама ұсынылды. Шара соңында балалар әскери қызметшілермен естелік суретке түсіп, ұмытылмас сәттерді есінде сақтап қалды.
Абай гарнизонының ұйымдастыруымен өткен бұл бастама – жас буынды Отансүйгіштікке баулудың жарқын үлгісі болды.
