Semeytany.kz – Абай облысының әкімі Берік Уәли бүгін Семей қаласындағы халық жиі баратын демалыс орындарын аралап, аспалы көпірде жүргізіліп жатқан жөндеу жұмыстарының барысымен танысты. Қазіргі таңда облыс орталығының қос жағалауын байланыстыратын көпірдің асфальт жабыны толық ауыстырылып жатыр. Жобаға 80-ге жуық жұмысшы мен 20-дан астам арнайы техника жұмылдырылған. Мамандар ертеңнен бастап арнайы материал төсеуге кірісетінін жеткізді. Жөндеу жұмыстары шілде айының басында аяқталуы тиіс.
Облыс басшысы кейін көпір астындағы қоғамдық кеңістікке барып, ондағы абаттандыру, көгалдандыру деңгейіне көңіл толмайтынын білдірді. Аталған аумақта муралдар, спорттық алаңдар, амфитеатр, фуд-корт және мейрамханалар бар болғанымен, күтімсіздік анық байқалады.
Берік Уәли Бейбітшілік аралындағы балалар теміржолы, этноауыл, спорт аймақтары мен тарихи ескерткіштердің де жағдайын бақылап көрді. Әсіресе көгалдандыру жұмыстары сын көтермейді: ағаштар қурап, шөп күйіп кеткен, суғарылмаған. Қоғамдық дәретханалар мен қызмет көрсету нысандарының аздығы тұрғындар тарапынан жиі сынға ұшырап келеді.
Осыған байланысты облыс әкімі Семей қаласы әкімінің міндетін атқарушы Бекжан Бапышевқа тазалыққа жауапты мекемелердің жұмысын шұғыл түрде ретке келтіруді тапсырды.
«Қала тұрғындары ең көп жиналатын екі демалыс орнында тәртіп пен тазалық сақталуы тиіс. Суғарылмаған ағаштар, күйіп кеткен көгалдар, техниканың орындықтарға зақым келтіруі, қоқыстың жиналмауы — мұның бәрі салғырттықтың көрінісі. Қала басшылығы бұл мәселені дереу шешуі қажет», — деді облыс әкімі.
Семейдің көрнекті орындары халық демалатын орталық болумен қатар, қала келбетінің айнасы саналады. Сондықтан бұл аумақтардың тазалығы мен жайлылығы — әкімдіктің тікелей жауапкершілігі екенін аймақ басшысы тағы бір мәрте еске салды.
