Semeytany.kz – 2025 жылдың мамыр айында ҚР ҰҚК Шекара қызметі Абай облысы бойынша департаменті шекаралық бақылау бағытында тұрақты әрі жоспарлы жұмыс жүргізіп, бірқатар құқықбұзушылықтарды анықтады.
Ай бойы 69 717 адам мен 26 340 көлік құралы шекарадан өткен. Сонымен қатар, қызмет барысында тыйым салынған заттарды, контрабандалық өнімдерді және артық жанар-жағармайды заңсыз алып өтпек болғандар ұсталған.
Электрошокер-фонарь алып өтпек болған бір азамат ҚР ӘҚБтК-нің 482-бабы бойынша 20 АЕК мөлшерінде айыппұлмен жазаланды. Ал жалпы 27 адам түрлі әкімшілік құқықбұзушылықтар үшін жауапкершілікке тартылып, 1,8 млн теңгеден астам айыппұл салынды.
Бір азаматтан қос азаматтық анықталып, сот шешімімен оған 200 АЕК көлемінде айыппұл салынды. Сондай-ақ, контрабандаға қатысты 5 дерек тіркеліп, 240-тан астам темекі өнімдері мен 112,4 литр спирттік ішімдік тәркіленді. Бұл заттар заңсыз болғандықтан, иелері шекарадан өткізілген жоқ.
Бұдан бөлек, нормадан тыс жанар-жағармай тасымалдауға қатысты 5 жағдай тіркеліп, 150 литр бензин, 130 литр дизель отыны және 100 литр мотор майы тәркіленді.
Шекара қызметі мемлекеттік шекарадағы қауіпсіздікті сақтау және заңдылықты қамтамасыз ету бағытындағы жұмысын жүйелі түрде жалғастырып жатқанын хабарлады.
