Semeytany.kz – Абай облысында мал сою инфрақұрылымын кеңейту мақсатында әр ауданда кемінде үш жаңа мал сою нысанын салу жоспарланып отыр. Бұл туралы өңірлік коммуникациялар қызметінде өткен баспасөз мәслихатында облыстық ветеринария басқармасының басшысы Ержан Барышев мәлімдеді.
Бүгінде облыс аумағында 87 мал сою орны бар, оның ішінде 74-і мал сою алаңы, 13-і мал сою пункті ретінде жұмыс істейді. Алайда, бұл нысандар өңірдегі қажеттілікті толық өтей алмай отырғандықтан, қосымша кешендер салу қажеттігі туындаған.
Сонымен қатар, мал арасында аса қауіпті аурулардың алдын алу шаралары жалғасып жатыр. 2025 жылы облыста 11 түрлі аса қауіпті ауруға қарсы 7 миллионнан астам екпе жүргізу көзделген. Оның ішінде бруцеллезге қатысты 725,3 мың мал тексеріліп, 1 619 оң нәтиже анықталған. Ержан Барышевтің айтуынша, соңғы үш жылда бұл індеттің таралуы бәсеңдеп келеді.
Сондай-ақ баспасөз жиынында қаңғыбас жануарларға қатысты мәлімет те айтылды. Жыл басынан бері облыс бойынша 5 688 қаңғыбас ит пен мысық ауланған. Оның ішінде Семей қаласында 2 202 жануар (2 035 ит, 167 мысық) ауланған. АСВШ бағдарламасы аясында 178 жануар ұсталып, 144-і қайтадан бұрынғы мекендеу орнына шығарылған. Қалған 34-і стерилизация мен вакцинациядан кейін шығарылады. Жыл соңына дейін бағдарлама аясында жалпы 435 жануар қамтылмақ.
Маманның айтуынша, өңірдегі ветеринариялық ахуал бақылауда, әрі барлық жоспарлы шаралар уақтылы орындалып жатыр.
