Semeytany.kz – Абай облысында мопедтерді көлік құралдары ретінде тіркеу міндетті болғаннан бері 156 жүргізуші әкімшілік жауапкершілікке тартылды. Бұл туралы өңірлік коммуникациялар қызметінде өткен баспасөз мәслихатында облыстық полиция департаментінің әкімшілік полиция басқармасының бастығы, полиция полковнигі Бауыржан Омаров мәлімдеді.
Спикердің айтуынша, 2024 жылдың сәуір айынан бастап мопедтер көлік құралдары санатына қосылып, оларға бірқатар талаптар қойылған. Атап айтқанда, мопед жүргізушілерінің қолында А, А1 немесе В санатындағы жүргізуші куәлігі болуы тиіс. Сондай-ақ көлік мемлекеттік тіркеуден өтіп, техникалық байқаудан өтіп, міндетті сақтандыру полисі рәсімделуі қажет.
Тіркеу рәсімі үшін азаматтар тұрғылықты жері бойынша арнайы халыққа қызмет көрсету орталығына барып, жеке куәлігі мен мопедтің техникалық құжатын немесе сипаттамасын ұсынуы керек. Сонымен қатар мемлекеттік баж салығы да төленеді.
Бүгінде облыс бойынша барлығы 1017 мопед тіркелсе, оның 545-і Семей қаласына, 92-сі Үржар ауданына тиесілі. Жыл басынан бері тіркелген құқықбұзушылықтардың ішінде 49 жүргізуші мас күйінде көлік басқарған, 66 адамда жүргізуші куәлігі болмаған. Бұдан бөлек, 6 жағдайда сақтандыру полисі рәсімделмегені, 4 жағдайда техникалық байқаудан өтпегені анықталған. Мопед қатысқан бір жол-көлік оқиғасы тіркеліп, екі адам жарақат алған.
Бауыржан Омаров мопед иелерін қауіпсіздік талаптарын сақтауға және заңда бекітілген ережелерге жауапкершілікпен қарауға шақырды.
