Semeytany.kz – Абай гарнизонының 44293 әскери бөлімінде 9 маусым мен 8 шілде аралығында тыл мамандықтары бойынша әскери міндеттілердің оқу жиыны басталды. Бір айға созылатын дайындыққа Семей, Аягөз қалалары мен Бородулиха ауданынан жүзден астам запастағы азамат шақырылған.
Оқу жиыны тыл қызметін қамтамасыз етуге бағытталған. Әскери міндеттілер жанар-жағармай, азық-түлік, киім-кешек, ветеринария және әскери қатынас сияқты мамандықтар бойынша білім алып, теориялық және тәжірибелік сабақтар арқылы өз біліктіліктерін жетілдіреді.
44293 әскери бөлімінің штаб бастығы полковник Самат Жиенбаевтің айтуынша, бұл азаматтар – бұрын әскер қатарында болып, қазір түрлі салада еңбек етіп жүрген тәжірибелі мамандар. «Бір ай ішінде олар толыққанды әскери даярлықтан өтіп, жиын соңында бос лауазымдарға тағайындалу мүмкіндігі қарастырылады», – дейді полковник.
Әскери жиынға шақырылғандар жатын орынмен, күніне үш мезгіл тамақпен және әскери киім-кешекпен толық қамтамасыз етілген. Сонымен қатар, олардың негізгі жұмыс орны мен атқарып жүрген лауазымы да сақталады.
Айта кетейік, әскери жиындар әскери бөлімдердің жауынгерлік әрі жұмылдыру дайындығын арттырып, әскер резервін нығайтуды көздейді.
