Semeytany.kz – Бүгін облыс әкімі Берік Уәли Шри-Ланкада өткен бокстан жастар арасындағы Азия чемпионатының жеңімпаздарын және олардың бапкерлерін қабылдап, халықаралық аренадағы жоғары жетістіктері үшін құрмет көрсетті.
Кездесуге Абай облысы бойынша әуесқой бокс федерациясының атқарушы директоры Жақсылық Ильясов пен федерация өкілдері де қатысты. Спортшыларға Алғыс хат пен ақшалай сыйлықтар табыс етілді.
54 келі салмақта өнер көрсеткен Жанель Имантаева Азия чемпионы атанып, ҚР спорт шебері нормативін орындады. Бұған дейін ол Якутскіде өткен Азия балалары ойындарының қола жүлдегері және 2023 жылғы ел чемпионатының күміс иегері болған.
Ал 57 келіде Ақнұр Тұрсынғали қарсыластарына дес бермей, чемпион атанды. Ол 2024 жылы ел чемпионатында күміс, 2023 жылы қола жүлде алған болатын.
Аймақ басшысы өз сөзінде жаттықтырушылар Асан Сексенбаев пен Ғайса Ернардың еңбегін ерекше атап өтті. Сондай-ақ, спортшылардың жарысқа қатысуына демеушілік көрсетіп жүрген кәсіпкер Махат Төрәліге алғыс білдірді. Облыс әкімі өңірде спорт саласына ерекше көңіл бөлініп жатқанын айтып, биыл жүзу бассейндері мен спорттық кешендердің құрылысы басталатынын жеткізді.
Семей боксшыларының жетістіктері бұнымен шектелмейді. Күні кеше жерлесіміз Ерасыл Жақпеков Нидерландта өткен Eindhoven Box Cup халықаралық турнирінде алтын медаль иеленді. Ол бұған дейін Тайландта өткен Азия чемпионатында қола, биыл жастар арасында Азия чемпионы атанған. Сонымен қатар, Ернар Карап пен Руслан Күзеубаев күміс жүлдеге қол жеткізді.
Бүгінде Абай облысынан 424 спортшы ұлттық құрама сапына енген. 2024 жылдың алғашқы жартысында облыс спортшылары 480-ге жуық медаль жеңіп алды, оның ішінде 114-і алтын.
