Semeytany.kz – Абай облысында жаз мезгілінде оқушыларға болашақ мамандықтарын таңдауға бағыт беретін кәсіптік бағдар беру лагерьлері өз жұмысын бастады. Аталған жоба 10 колледж базасында жүзеге асып, 500-ге жуық оқушыны қамтиды.
Лагерь бағдарламасы әр колледждің бейіміне қарай жасақталған. Мәселен, Бесқарағай колледжінде алғаш рет ашылған «ЭКОorman» аграрлық-экологиялық лагерінде оқушылар ландшафтық дизайн, жылыжай ісі, флористика және ауыл шаруашылығын механикаландыру негіздерін меңгереді.
Семейдегі IT және жаңа технологиялар жоғары колледжінде жұмыс істейтін «SmartKriS» лагерінде балалар робототехника, бағдарламалау, веб-дизайн және интернет заттары бойынша тәжірибе жинақтап жатыр. Ал политехникалық колледждің «Summer Camp» шығармашылық лагерінде тігін, аспаздық өнер, қолданбалы бұйым жасау бағыттары қамтылған.
Үржар колледжіндегі «Үржар-Айым» лагерінде ауыл шаруашылығы, дәнекерлеу, ветеринария мен аспаздық салаларында оқыту ұйымдастырылған. Семей қаржы-экономикалық колледжіндегі SFEK Summer Camp бағдарламасы аясында веб-даму, графикалық дизайн, мобилография және бухгалтерлік есеп негіздері оқытылуда.
Шәкәрім жоғары колледжінде ашылған «Толағай» лагерінде экология, ұлттық мәдениет және денсаулық сақтау тақырыптары қамтылған. Сонымен қатар, электротехникалық колледждегі IT лагерінде стартап жобалар әзірленіп, хакатондар ұйымдастырылады.
Жазғы лагерьлер оқушылардың мамандық таңдауда саналы шешім қабылдауына жол ашып, тәжірибе мен дағдыны үйлестіре дамытуды көздейді.
