Semeytany.kz – 2025 жылдың қаңтар-мамыр айларында еліміздің жалпы ішкі өнімі өткен жылдың осы кезеңімен салыстырғанда 6%-ға өсті. Бұл туралы Ұлттық статистика бюросы алдын ала мәлімет таратты.
Экономиканың өсіміне өнеркәсіп, құрылыс, көлік және байланыс салаларындағы белсенділік ықпал етті. Атап айтқанда:
✅ Өнеркәсіп өндірісі 6,4%-ға артты. Өсім елдің барлық 17 өңірінде байқалды. Ең жоғары өсім Жамбыл облысында (+22,9%) тіркелді. Түркістан (+14,8%), Жетісу (+14,8%), Алматы (+14,1%) және Шымкент (+18,9%) қалаларында да айтарлықтай өсім байқалды.
✅ Ауыл шаруашылығы 4,0%-ға ұлғайды. Бұл көрсеткіш былтырғы 3,9%-дан жоғары. Атырау облысы (+10,4%), СҚО (+7,5%) және Ақмола облысы (+6,5%) алда келеді. Абай облысында бұл саладағы өсім – 3,6%.
✅ Құрылыс секторы 15,4%-ға өсіп, 18 өңірде қарқынды дамыды. Маңғыстау облысында жұмыс көлемі екі есеге артты. Қызылорда (+64,5%), Қостанай (+57,8%), Астана (+51,8%) және Түркістан (+46,6%) өңірлері көш бастады. Биылғы бес айда 6 млн шаршы метрден астам тұрғын үй пайдалануға берілді, бұл өткен жылмен салыстырғанда 5,7%-ға артық.
✅ Негізгі капиталға салынған инвестициялар 18,2%-ға артты. Қаржы негізінен көлік, әлеуметтік инфрақұрылым және жаңа өнеркәсіп нысандарына бағытталған.
✅ Сауда айналымы 7,8%-ға ұлғайды. Көтерме сауда үлесі – 68%. Түркістан облысы (+66,2%), Ақмола (+48,9%) және Шымкент (+23,1%) айтарлықтай көрсеткішке ие.
✅ Байланыс және телекоммуникация саласы 2,8%-ға өсті. Бұл өсім негізінен интернет қызметтері есебінен (+13,9%) қамтамасыз етілген.
✅ Көлік секторы 23,1%-ға өсті. Жүк теміржол тасымалы (+17%) және құбыр арқылы тасымалдау (+13,8%) артып отыр. Жетісу облысы (+39,1%), Абай облысы (+17,7%) және Ақтөбе облысы (+11,3%) жетекші орында.
Экономикалық өсімге үлес қосқан салалардың үйлесімді дамуы елдің әлеуметтік-экономикалық тұрақтылығын қамтамасыз етуде. Үкімет бұл бағыттағы жұмыстарды Президент тапсырмасына сәйкес бақылауда ұстап отыр.
