Semeytany.kz – 2025 жылғы 30 маусымнан бастап Ресейде шетел азаматтары мен азаматтығы жоқ тұлғалардың елге кіру тәртібіне қатысты жаңа талаптар күшіне енеді. Бұл – көші-қон үдерістерін реттеу мен ел қауіпсіздігін арттыруды көздейтін реформаның екінші кезеңі.
Жаңа ереже 2024 жылғы 1 қарашада бекітілген Ресей Үкіметінің №1510 қаулысына сәйкес енгізіліп отыр. Екінші кезең визасыз режимдегі барлық елдердің азаматтарына қатысты, Беларусь Республикасынан басқасы.
Не өзгереді?
2025 жылғы 30 маусымнан бастап Ресейге сапар жоспарлаған шетелдіктер сапар басталардан кемінде 72 сағат бұрын “Госуслуги RuID” мемлекеттік порталы арқылы онлайн тіркеуден өтуі тиіс. Ерекше жағдайларда (мысалы, науқасқа бару немесе туысының қайтыс болуы) тіркеу сапарға 4 сағат қалғанда да мүмкін болады.
Онлайн анкетаға енгізілетін мәліметтер:
-
Жеке ақпарат
-
Сапар мақсаты
-
Жүріп өту бағыты
-
Ресейдегі тұратын мекенжай
-
Қажетті құжаттар туралы дерек
-
Фото жүктеу
Тіркеуден өткен тұлға QR-код алады. Бұл код шекарадан өткенде тексеру үшін қажет. Сонымен қатар, Ресейге келгеннен кейін шетелдік азаматтар портал арқылы тұру мекенжайы бойынша тіркеу, медициналық сақтандыру рәсімдеу сынды қызметтерге қол жеткізе алады.
Биометриялық тіркеу міндеттеледі
Елге кірген соң 10 күн ішінде шетел азаматтары бірыңғай биометриялық жүйеге саусақ іздері мен фотосуретін енгізуі тиіс. Бұл талап тек екінші кезеңге қатысатын өткізу бекеттері арқылы кіретіндерге қатысты.
Кімдер босатылады?
-
Беларусь азаматтары
-
6 жасқа дейінгі балалар
-
Дипломатиялық мәртебесі бар тұлғалар
-
Халықаралық ұйым қызметкерлері
-
Визамен немесе ықтиярхатпен (РВП/ВНЖ) кіретіндер
6–18 жас аралығындағы балалар үшін тіркеуді ата-анасы немесе заңды өкілі жасай алады. Бұл ретте өкілдің өз атына да тіркеу рұқсаты болуы қажет.
Бұл шаралар Ресей аумағында шетел азаматтарының қозғалысын цифрлық бақылауға көшуді және қауіпсіздікті күшейтуді көздейді.
