Semeytany.kz – Бүгін облыс әкімі Берік Уәли жұмыс сапарымен Бесқарағай ауданына барып, туризм және ауыл шаруашылығы бағытында жүзеге асып жатқан бірқатар жобалардың барысымен танысты.
Сапар барысында аймақ басшысы алдымен Глуховка ауылдық округіндегі “Маклапов Н” жеке кәсіпкерлігінің жұмысын көрді. 2023 жылы құрылған бұл кәсіпорын балық шаруашылығын экотуризммен ұштастырып, жылына 100 тоннаға дейін өнім өндіруді көздейді. Шаруашылыққа тиесілі 6 жасанды тоғанда түрлі түсті форель, сібір бекіресі, тұқы және сазан балықтары өсірілуде.
Старая Крепость ауылында 300 миллион теңге көлеміндегі жеке инвестициямен жүзеге асып жатқан бұл жоба қазір 80 пайызға дайын. Демалушылар үшін үйлер салынып, алдағы уақытта бассейн мен футбол алаңы бой көтереді. Туристік нысан жыл соңына дейін пайдалануға беріледі. Негізгі жолдан балық шаруашылығына дейінгі 400 метр жерге қиыршық тас төселген. Кәсіп иесі облыс әкімінен жолға асфальт төсеу және балық азығына субсидия бөлу мәселесінде қолдау сұрады. Берік Уәли бұл бағытта тиісті көмек көрсетілетінін жеткізді.
Сонымен қатар, өңір басшысы Семейден 27 шақырым қашықтағы «Zhylandy Eco Village» жобасымен де танысты. Ағаш үйлерден тұратын демалыс орнына бассейн, монша, жазғы алаң, балалар және футбол алаңдары салынуда. Қазіргі таңда үш демалыс үйі дайын. Жоба толық іске қосылғанда ауыл тұрғындары үшін тұрақты жұмыс орындары ашылады деп жоспарлануда.
– Бесқарағай – табиғаты ерекше, туристік әлеуеті зор өңір. Қарағайлы орман ішінде орналасқан екі жоба да отбасылық демалыс үшін таптырмас орын. Мұндай мүмкіндіктерді тиімді пайдаланып, туризмді дамытуды жалғастыру керек. Жобалар толық аяқталып, құжаттары өткізілген соң мемлекет тарапынан салынған инвестицияның 10 пайызы қайтарылады, – деді облыс әкімі.
